تاكتيك فى الخمسينه/ tactic fe el5msena, Rabat (2026)

08/06/2026

من وجهة نظري اختيار النادي الأهلي لـ حسين عموتة يعتبر اختيار مناسب جدًا، رغم إني كنت أميل أكتر لـ يورشيتش بحكم إنه فاهم الدوري المصري واللاعبين بشكل أكبر من خلال تجربته السابقة. لكن لما تبص للصورة بشكل أوسع هتلاقي إن عموتة مدرب حافظ الكرة الإفريقية كويس جدًا وعنده شخصية قوية في إدارة غرفة الملابس، ودي نقطة مهمة في فريق مليان نجوم وأسماء كبيرة. كمان شوفت له لقاء قبل كده وكان بيتكلم عن إن أهم حاجة عنده هي اللاعب الملتزم بالتعليمات والتاكتيك، واللاعب اللي عنده القدرة يستوعب التوجيهات ويتأقلم مع أي تعديل فني وينفذه بشكل صحيح وفي أسرع وقت سواء أثناء المباراة أو في التدريبات، ودي نقطة أنا شايفها مهمة جدًا لأي فريق عايز ينجح على أعلى مستوى. أكتر حاجة بتطمني في الاختيار ده إنه من نوعية المدربين اللي مبيفرقش معاهم اسم اللاعب قد ما بيفرق معاهم التزامه وتنفيذه للفكر الفني، ومفيش لاعب أكبر من الفريق أو أهم من نجاح المنظومة. وده بالضبط اللي الأهلي محتاجه في الفترة الجاية مع وجود عدد كبير من النجوم، مدرب شخصيته قوية ويقدر يسيطر على غرفة الملابس ويحافظ على الانضباط ويخلي مصلحة الفريق فوق أي اعتبارات فردية. 🔴🦅

07/06/2026

تحليل ماتش مصر والبرازيل | مصر 1-2 البرازيل

في الأول حابب أقولكم إن الفترة الجاية ممكن أقل شوية في الفيديوهات بسبب ظروف عندي، فهحاول أشارككم تحليلات المباريات في شكل بوستات مكتوبة. أتمنى الطريقة دي تعجبكم وتوصل الفكرة بشكل كويس

بداية الماتش مكنتش أحسن حاجة خالص، منتخب مصر فشل في أول 5 دقايق في مرحلة بناء اللعب، وكان واضح جدًا إن فيه ارتباك وأخطاء فردية بين اللعيبة. ورغم كده، التحولات الهجومية لسه عندها شكل وفكرة كويسة وممكن يتبني عليها.

هدف البرازيل الأول جه من خطأ ساذج من مهند لاشين، والارتباك كان واضح عليه جدًا. ومن وجهة نظري دي مش أول مرة، لأن مهند في الماتشات الكبيرة ساعات بيبقى خايف ومش واثق في نفسه بالشكل الكافي، وده بيأثر على قراراته جوه الملعب.

مصطفى زيكو لاعب كويس ومن نوعية اللعيبة اللي بتحب تشوفها بتلعب، لكن هو كمان وقع في أخطاء تمرير وكان متأثر بحالة الارتباك الموجودة في الفريق.

أول ربع ساعة كانت المسافات بين الخطوط كبيرة جدًا، وده خلّى التمريرات الغلط تزيد، وكنا مستعجلين بشكل مبالغ فيه في نص الملعب فبنفقد الكورة بسهولة. والمشكلة كمان إن أي خطأ بنعمله في التلت الهجومي كان بيتحول لهجمة خطيرة علينا، ولولا تألق مصطفى شوبير كنا استقبلنا هدف تاني بدري جدًا.

بصراحة كان واضح إن فيه رهبة عند لاعيبة المنتخب رغم إن الإمكانيات موجودة. لكن عقلية اللاعب المصري قدام المنتخبات الكبيرة لسه محتاجة تتطور أكتر ويبقى عنده ثقة أكبر في نفسه.

منتخب مصر كان سايب الاستحواذ للبرازيل وبيبدأ الضغط لما الكورة تدخل نص ملعبنا، وفي نفس الوقت استمرت معاناتنا في الخروج بالكرة تحت الضغط. ورغم إن الشوط الأول انتهى بالتعادل، لكن الحقيقة إحنا تقريبًا معملناش جملة هجومية منظمة أو فرصة حقيقية، غير إننا استغلينا خطأ المنافس وسجلنا منه هدف.

في الشوط التاني نفس الأخطاء استمرت، وفشل بناء اللعب تحت الضغط فضل موجود وكلفنا هدف تاني. كمان الرتم عندنا كان بطيء جدًا مقارنة بالبرازيل، والعشوائية كانت واضحة في أوقات كتير. حتى في بعض المرتدات كنت تحس إن اللعيبة مركزة مع تحركات لاعيبة البرازيل أكتر من تركيزها مع الكورة نفسها.

ياسر إبراهيم بصراحة عانى كتير خلال الماتش، وكثرة التدخلات غير المحسوبة كانت ممكن تكلفنا أكتر من كده.

ولما مش عارف تخرج بالكرة من تحت الضغط وبتلجأ للكرات الطويلة، لازم لاعيبة الخط الأمامي تكون قريبة من بعض عشان تقدر تكسب الكرة التانية. لكن اللي حصل إن المسافات كانت كبيرة جدًا فالكورة كانت بترجع للبرازيل بسهولة.

محمد صلاح كان أكتر لاعب بيتحرك في الملعب، وشغله في الضغط وغلق زوايا التمرير كان واضح جدًا. أما إمام عاشور فكان في رأيي أكتر لاعب محلي لما بيمسك الكورة بيبقى واثق من نفسه ومرتاح ومش خايف من الضغط.

ومن وجهة نظري، وجود إمام عاشور أو محمود صابر من البداية جنب مروان عطية كان ممكن يساعد المنتخب أكتر في مرحلة بناء اللعب والخروج بالكرة.

الخلاصة، الخسارة من البرازيل 2-1 مش هي المشكلة، لكن المشكلة في الأخطاء الفردية الساذجة وطريقة التعامل مع الضغط العالي. البرازيل نفسها مظهرتش بشكل مرعب، وكنت أتمنى أشوف منتخب مصر بشخصية وثقة أكبر.

أتمنى حسام حسن يكون شاف المشاكل دي كلها، خصوصًا أزمة بناء اللعب والخروج بالكرة تحت الضغط، لأن دي من أهم الحاجات اللي لازم تتحل قبل أي بطولة كبيرة.

ماتش مهم كشف عيوب كتير، والأهم إننا نستفيد منه ونتعلم منه. وبالتوفيق لمنتخب أم الدنيا في مشوار كأس العالم 🇪🇬❤️

✍️ كتابة: محمد رأفت