KBA Uskana

Darka tradicionale e fundvitit e KAB “Uskana” – Kërçovë.
Ecja malore nuk është vetëm aktivitet fizik, por një shkollë karakteri që forcon trupin, qetëson mendjen dhe kultivon solidaritetin mes njerëzve.
Le të vazhdojmë ta ngjisim çdo shteg me pasion, përkushtim dhe dashuri për malet.
Me këtë rast, ju urojmë një vit të mbarë, shëndet të plotë dhe suksese edhe më të mëdha në të gjitha sfidat që na presin.

Të dashur dashamirë të natyrës,

Klubi Bjeshkatar Alpin “USKANA” këtë të diel organizon ngjitjen tradicionale para Vitit të Ri në relacinonin f.Prapadisht - Qafë - Maja e Ujëmirit 2062 m dhe anasjelltas! Disniveli 923 m.

📢 Aktiviteti do të zhvillohet ditën e diel më datë 21.12.2025.

🕗 Nisja: 07:00 / para restorantit Romansa.
🚍 Lloji i transportit: Vetura private
📍 Ecja fillon nga hyrja për në f.Prapadisht dhe përfundon po në të njejtin vend.
📛 Distanca totale e ecjes: 14 km.
📛 Niveli i ecjes: mesatarisht i vështirë.

📜 Informata shtesë:

- Shtegu bën pjesë në shtigjet mesatarisht të vështira!
- Ardhja në kohën e caktuar në vendin e caktuar.
- Respektimi dhe përcjellja e rregullave të caktuara nga udhëheqësi i ecjes.
- Ruajtja e natyrës duke mos hedhur mbeturinat.
- Përgatitja fizike dhe psikike janë përgjegjësi individuale dhe KBA “USKANA” nuk mer përgjegjësi në rast lëndimi.

Të interesuarit për rezervime duhet të kontaktojnë në
☎️ +38971254810, ose
✉️ e-mail: [email protected]

Sot realizuam me sukses sfidën e radhës me KAB Struga. Rrugëtimin e nisëm nga Belica e Epërme drejt majës së Parumbes, për të kaluar në anën shqiptare te stani i Urimit, ku na priste dreka.
Koha me diell na mundësoi të shijojmë plotësisht bukuritë magjepsëse që ofron natyra në këtë stinë të artë të vjeshtës.
Një falënderim i veçantë për KAB Struga për bashkëpunimin dhe respektin e treguar ndaj nesh.

KBA “Uskana” organizoi një darkë të përbashkët, ku u bë analiza e aktiviteteve të deritanishme dhe u diskutuan planet për të ardhmen.

Ngjitje e suksesshme në majën e Trigllavit – 2864 m

Shoqata Bjeshkatare “Uskana” – Kërçovë njofton me krenari se anëtari i saj, Qerim Halili, ka realizuar me sukses ngjitjen në majën e Trigllavit (2864 m), një nga kulmet më të larta dhe më sfiduese të Alpeve Juliane.

Ekspedita u organizua nga Shoqata Alpiniste “Nivishta – Reka e Epërme”, nën udhëheqjen e kryetarit të saj Bardhyl Miftari. Në këtë ngjarje morën pjesë edhe alpinistë nga disa shoqata bjeshkatare: “Uskana” – Kërçovë, “Dardania” – Shkup dhe “Scardus” – Dobrosht, duke krijuar një frymë bashkëpunimi dhe miqësie ndërmjet dashamirëve të maleve.

Maja e Trigllavit, e cila ngrihet në lartësinë 2864 metra, është simbol kombëtar i Sllovenisë dhe pjesë e Parkut Kombëtar të Trigllavit, një nga destinacionet më prestigjioze për alpinistët evropianë. Ngjitja në këtë majë konsiderohet si një sfidë e veçantë dhe një përvojë e paharrueshme për çdo dashamir të maleve.

Ngjitja e suksesshme në Trigllav nuk është vetëm një arritje sportive, por edhe një dëshmi e përkushtimit dhe pasionit për natyrën dhe alpinizmin. Ky sukses na kujton se çdo majë është e arritshme kur pasioni, këmbëngulja dhe bashkëpunimi bashkohen.

Një sfidë e jashtëzakonshme e realizuar me sukses!

Anëtari i KBA “Uskana”, Kujtim Zendeli, së bashku me moderatorin e njohur Resul Sinani, në periudhën njëmujore nga 17 korriku – 17 gushti, realizuan një mision unik e të vështirë, ngjitjen e 15 majave më të larta të 15 shteteve të Evropës Juglindore dhe Qendrore.

Këta dy entuziastë të maleve, me përkushtim, guxim dhe dashuri për natyrën, arritën të ngjisin majat madhështore:
1. Olimp – 2918 m (Greqi)
2. Musalla – 2925 m (Bullgari)
3. Moldovenau – 2544 m (Rumani)
4. Rysy – 2501 m (Poloni)
5. Gerlachowski Shtit – 2655 m (Sllovaki)
6. Zugspitze – 2962 m (Gjermani)
7. Grossglockner – 3789 m (Austri)
8. Dufourspitze – 4634 m (Zvicër)
9. Marmolada – 3343 m (Itali)
10. Triglav – 2864 m (Slloveni)
11. Dinara – 1831 m (Kroaci)
12. Magliç – 2386 m (Bosnje dhe Hercegovinë)
13. Kollata e Keqe – 2534 m (Mali i Zi)
14. Korabi – 2764 m (Shqipëri)
15. Gjeravica – 2656 m (Kosovë)

Ky mision nuk ishte vetëm një sfidë sportive, por edhe një dëshmi e vlerave që përfaqëson alpinisti Kujtim Zendeli si anëtar i dalluar i KBA “Uskana”, vendosmëri, përgatitje fizike dhe shpirt garues, duke promovuar jo vetëm bjeshkatarinë, por edhe bukuritë e natyrës.

KBA “Uskana” përgëzon ngrohtësisht Kujtimin dhe Resulin për këtë arritje të jashtëzakonshme, duke ju uruar shëndet dhe forcë për të ngjitur edhe shumë maja të tjera në të ardhmen, gjithmonë duke ngritur lart emrin e klubit dhe duke frymëzuar gjeneratat e reja të bjeshkatarëve.

Në vijim ju përcjellim disa nga fotografitë e sfidës së realizuar.

Alpinisti i njohur nga Kërçova dhe anëtar i Klubit Bjeshkatar Alpin “Uskana” arriti me sukses të ngjitej në majen më të lartë të Azerbajxhanit – Bazarduzu (4466 m), e cila njëkohësisht është një ndër majat më të larta të vargmalit të Kaukazit.

Kjo ngjitje ishte kulmi i një ekspedite dyjavore me biçikletë nëpër Azerbajxhan, ku Kujtimi përshkoi me pedalim për katër ditë rreth 500 kilometra nga kryeqyteti Baku deri në fshatin Khinalig – një fshat alpin që ndodhet në lartësinë 2200 metra mbi nivelin e detit dhe konsiderohet si një ndër vendbanimet më të larta në Kaukaz.

Nga aty, ai iu bashkua një ekspedite të organizuar nga guida të licencuara ndërkombëtare, të përbërë nga alpinistë nga SHBA-ja, Hungaria, Kroacia, Kirgistani dhe Azerbajxhani. Pas dy ditësh ngjitjeje të lodhshme dhe të mirëkoordinuar, grupi arriti me sukses në majen Bazarduzu – një destinacion që kërkon leje të veçantë ushtarake për shkak të afërsisë me kufirin e Federatës Ruse, e cila konsiderohet zonë e ndjeshme ushtarake.

Ngjitja u krye në kushte të sigurta, me pajisje të specializuara dhe nën kujdesin profesional të guidave të certifikuara, duke respektuar të gjitha protokollet për lëvizje në terrene alpine dhe zonë kufitare.

Pas këtij suksesi, Kujtimi po vazhdon aventurën e tij dyjavore nëpër Azerbajxhan, ku është duke eksploruar vende të veçanta kulturore, natyrore dhe historike, shumë prej të cilave mbeten ende të panjohura për shumicën e turistëve nga Evropa.

KBA “Uskana” e përgëzon anëtarin e saj Kujtimin për suksesin e arritur dhe i uron mbarësi dhe suksese të tjera në aventurën e mëtejme në Azerbajxhan.

KBA “Uskana” i përgjigjet pozitivisht ftesës së SHA “Nivishta” - Reka e Epërme dhe do të marri pjesë ditën e diel, 15.06.2025, në “Marshin e përvjetoreve”.

Shtegu:
Fshati Koritë 1350 m/lmd - Maja Taul 1853 m/lmd dhe anasjelltas.
Kategoria e shtegut: mesatar.
Gjatësia e shtegut: 12 km në dy drejtime.
Disniveli: afërsisht 520 metra

Të interesuarit të paraqiten më së voni deri të shtunën, 14.06.2025, në ora 16:00 për shkak të organizimit të udhëtimit.
Nisja të dielën në ora 7:00 nga Arabella.

Ta kaloshë ditën në bjeshkë, është mënyra më e duhur ta shpërblesh veten, prandaj thonë:
"Natyra është mjeku më i mirë".
Bjeshkatarët e KAB " Uskana" nga Kërçova sot shijuan bukuritë e natyrës mbi fshatin Tuhin të Kërçovës, duke u ngjitur nga Hasket, Arat e Bashe, Çerenec, Kalanë e Tuhinit, Majën e Belezit, Stanin e Bajramit.
--Ecje........15.5 km
---Disnivel.....1095 m
-----Lmd........1840m
12.04.2025.....Kërçovë

KBA “Uskana” sot ishte pjesë e Marsh*t të 7 Marsit - Ditës së Mësuesit dhe Shkollës Shqipe, shteg i organizuar nga SHB “Sytë e Sharrit”, bashkë me SHB “Shkupi”, SHB “Tetova”, SHB “Bukuritë e Sharrit”, si dhe disa bjeshkatarë nga Presheva. Me këtë rast ngjitëm majen e Malit të Krojeve (Vodno).

Ecje e mrekullueshme në relacionin Novosell - Maja e Çelëvjollcës, 1897 m. Pamjet panoramike të Çelëvjollcës, e mbuluar me borë, ishin mahnitëse. Qetësia e maleve dhe shkëlqimi i borës krijuan një atmosferë të veçantë që na dha ndjesinë e kënaqësisë për të shijuar natyrën e kësaj ane.

Gëzuar pavarësinë Kosovë!