17/09/2026
Kronaka Milanista minn Frans Deguara...
Milan-Benfica 0-2 ...Amorim, fejn hu l-logħob?!
Fl-1 partita tal-fażi tal-gruppi fl-Europa League, il-Milan ospitaw il-Benfica u tilfu 0-2... wara wirja diżastruża (bil-Lusitani b’ħafna plejers neqsin!), fejn komplew ma jiskurjawx fl-1 taqsima għall-5 logħba konsekuttiva, imma did-darba anke wara li Amorim bidel xi plejers, il-froġa kienet kompleta. Stennejna ħafna aħjar, għax barra li l-kowċ (+ Goncalo Ramos u Diego Moreira) huma eks Benfica, u l-aktar wara l-wirja tajba fit-2 taqsima vs Lazio. Beda b’formazzjoni anomala b’turnover ġmielu, imma anke wara li daħħal xi titulari ftit rajna progress. Fejn hu l-logħob “dominanti” li wiegħed?! Veru li bħala pussess tal-ballun kellu mas-60% imma kienx effettiv. Irid jifhem li ċerti plejers sempliċiment mhumiex ta’ Milan (forsi riservi), u kif qallu Capello: “l-ewwel sib il-leaders, li huma Pulisic u Rabiot, u ibni t-tim madwarhom”. Imma mill-esperjenzi preċedenti jidher li Ruben għandu rasu iebsa ħafna... issa naraw.
Diżappunt ieħor fit-telfa kien li kellu jkun kowċ Portugiż li jitlef għall-ewwel darba mal-klabb Portugiż li miegħu l-Milan qatt ma tilfu!! Infatti fis-6 logħbiet ta’ qabel insibu 4 rebħiet u żewġ pareġġi (bi 8 gowls kontra 3)! U xieraq kien l-omaġġ li taw lill-President tal-Benfica, l-eks plejer Manuel Rui Costa, li lagħab mal-Milan bejn l-2001 u l-2006 fejn rebaħ Champions League, Coppa Italia u Supercoppa UEFA fl-2003, kampjonat u Supercoppa Taljana fl-2003/04. Lagħab 192 darba u skorja 11-il gowl (fis-Serie A 124 – b’4 gowls)... imma jispikkaw ukoll il-55 assist!! Fl-aħħar sentejn tiegħu bdiet l-era ta’ Riccardo Kakà. Lil Rui Costa ppreżentawlu l-flokk bin-nru 10 (u lil Altafini dak bin-nru 9), u ddikjara: “Li niġi milqugħ b’dal-mod hu mument ta’ unur kbir. Grazzi lil kulħadd għal dawn il-5 snin meraviljużi li qattajt hawn. Irbaħna flimkien magħkom. Li nagħmel parti minn din l-istorja tagħmilni orgoljuż”. Żmijnijiet ferm, u ferm, u ferm isbaħ!!
KRONAKA. Quddiem 68,393 persuna (fosthom Ibra), il-Benfica bdew aħjar. U ma kinitx sorpriża li fetħu l-iskor fis-16’ permezz ta’ Dodi LUKEBAKIO, li b’xutt bix-xellug wara ħarba mil-lemin fejn Bartesaghi kien wisq timidu. Il-Lusitani laqtu wkoll il-lasta fit-22’ permezz ta’ Sudakov, ballun mitluf minn Jashari... bil-Milan jibqgħu jbatu fuq il-linja xellugija!
Wara l-intervall Amorin daħħal lil Gila u Pulisic flok Hutchinson (li għoġobni) u Terracciano. Fil-50’ De Winter tilef ċans kbir inkredibbilment. 3’ wara l-Benfica rduppjaw, bil-Milan jibqgħu passivi. U emblematika kienet l-azzjoni tal-gowl. El Karouai kompla azzjoni wara xutt ta’ Duran li ħabat ma’ difensur, daħal Jakob KAMINSKI li tefa’ wara Maignan faċilment... bi 8 (!) plejers Milanisti fil-kaxxa jħarsu lejn il-ballun! Fis-56’ daħlu Moreira e Saelemaekers flok Cisse u Bartesaghi, u fit-72’ Rabiot flok Jashari. Qabel, fil-61’ il-gowler Trubin salva b’diffikultà xutt sabiħ ta’ Pulisic, fost l-aktar attivi. Mill-bqija l-Benfica ikkontrollaw l-attakki konfużi tal-Milan, u rebħu meritatament... u kien ġust it-tisfir tat-tifosi Milanisti lejn it-tim tagħhom.
L-istatistika turi: xuttijiet: 17-11 (fil-lasta 4-4); fawls 14-12; korners 10-1; pussess ballun 60.5%-39.5%... li ma turix preċiż l-andament tal-logħba, għax il-Benfica kienu f’kontroll assolut tul il-partita kollha. L-aħjar (jekk nistgħu ngħidu hekk) kienu Pulisic u Rabiot, iżda kien hemm ħafna insuffiċjenzi!
Il-Milan lagħbu hekk (3-4-2-1): Maignan; Terracciano (46’ Gila), De Winter, Pavlovic; Chukwueze, Musah, Jashari (73’ Rabiot), Bartesaghi (57’ Moreira); Hutchinson (46’ Pulisic), Cisse (57’ Saelemaekers); Ramos. Riservi: Torriani, Estupinan, Gabbia, Tomori, Loftus-Cheek, Modric u Camarda. Ir-referì kien l-Awstrijak Jarred Gillett.
KURŻITAJIET.
PASSIVITÀ. A propożitu tat-2 gowl tal-Benfica, l-eks Costacurta stqarr hekk quddiem Capello: “Darba l-Mister (għalih) ma lagħbnix għal żball bħal dak. Meta staqsejtu l-għala qalli [għax ma mmarkajt lil ħadd fil-kaxxa]”!!
IBRA. Fl-14 ta’ Settembru, jumejn qabel id-debutt tal-Milan fl-Europa League, f’Milanello reġa’ deher Ibrahimovic! Huwa sellem il-plejers u l-kowċ ‘il-ġdid’ (għalih!). Kien ilu 6 xhur ma jixref sa Milanello... mit-22 ta’ Marzu, 2026 (wara l-partita Milan-Torino 3-2). Wara kellu l-famuż argument aħrax ma’ Max Allegri u ma resaqx aktar ’l hemm... tant li l-kampanja akkwisti mexxewha Cardinale u l-AD Calvelli. Imbagħad Ibra mar l-Istati Uniti fejn ikkummenta l-partiti tat-Tazza tad-Dinja għall-istazzjon televiżiv Fox Sports.
AMELIA. Ta’ min jirrimarka li għal Milan-Benfica fis-sede tal-MCM 1979 (fil-Ħamrun Liberty) kien hemm preżenti l-eks gowler Marco Amelia, li mal-Milan lagħab 29 logħba bejn l-2010 u l-2014, u 9 partiti mat-tim nazzjonali Taljan, fosthom bħala t-3 gowler mat-tim rebbieħ tat-Tazza tad-Dinja fl-2006. Huwa mwieled fit-2 t’April, 1982, u bħalissa huwa l-kowċ ta’ Ħamrun Spartans. Prosit lill-Kumitat tal-inizjattiva.
SAN SIRO L-ĠDID. Ikompli l-iter għall-bini tal-grawnd il-ġdid ta’ Milan u Inter. U lejn l-aħħar t’Ottubru se jiġu ppubblikati l-pjanti mid-ditta responsabbli, Foster+partners e Manica, l-istess li pproġettaw il-Wembley ġdid f’Londra. Il-grawnd mistenni jkollu 71,500 post (li 13,000 minnhom se jkunu fis-sezzjoni Premium), u mistenni jkun lest sal-2032, għal spiża ta’ madwar €2 miljardi u 150 miljun. Il-proġett jinkludi uffiċċji, lukandi, spazji kummerċjali, u ħafna ħdura. L-attività tista’ tħalli profitti madwar €418-il miljun fis-sena. U ladarba jinbiegħ il-bini l-ġdid u jitħallsu l-ispejjeż, kull soċjetà mistennija jkollha madwar €265 miljun ta’ plusvalenza annwali. Issa naraw.
Il-partita li jmiss: Milan-Lecce, tas-Serie A, nhar il-Ħadd, 20 ta’ Settembru, fid-20:45.
Ritratti (fuq): il-gowl ta’ Lukabakio fis-16’, u dak ta’ Kaminski fit-53’; (nofs): l-istess gowl bi 8 (!) plejers Milanisti jħarsu lejh fil-kaxxa; u t-tislima li l-klabb u t-tifosi taw lill-eks plejer maħbub Rui Costa, illum President tal-Benfica; (taħt): Altafini jiġi ppreżentat ukoll bil-flokk nru 9 (tifkira tad-doppjetta li skorja fil-finali tal-Coppa Campioni Milan-Benfica 2-1 tal-1963; u Marco Amelia, l-eks plejer tal-Milan u llum kowċ ta’ Ħamrun Spartans, jidher f’nofs is-sapporters Maltin fis-sede tal-MCM 1979 fil-Ħamrun Liberty.
Kwalunkwe opinjoni espressa minni mhux bilfors hi l-istess tal-Milan Club Malta 1979.
