Milan Club Malta 1979

Kronaka Milanista minn Frans Deguara...

Milan-Cagliari 1-2 – staġun fallimentari!
Barra kollha... ħlief wieħed!

Fit-38 programm tas-Serie A, il-Ħadd, 24 ta’ Mejju, 2026, il-Milan ospitaw lill-Cagliari u tilfu 1-2... biex spiċċaw fil-5 post u barra miċ-Champions League... inkredibbli!! Irnexxielhom jitilfu ma’ tim li ġa kien salva postu u fottew dak kollu tajjeb li wettqu tul l-istaġun – fejn għal 36 logħba dejjem kienu fl-ewwel 3 postijiet! Ma titwemminx! Biex spiċċaw fil-5 post, wara Inter u Napoli, u nqabżu mir-Roma (fit-3 post bi 73 punt) u Como (71 punt) u 2 punti fuq Juventus. Kulma riedu pareġġ u jaċċertaw post fiċ-Champions League flok il-Como!!
Il-Cagliari, li rebħu f’San Siro wara 29 sena! ma serqu xejn, anzi kellhom aħjar ċansijiet, u dehru aktar motivati mill-Milan... ma nistax nifhimha, jew aħjar għandi suspett. U kien ġustissimu t-tisfir u l-ibbuwjar mill-grawnd kollu, wara li ssapportjawhom tul il-logħba kollha. U reġa’ deher li għal ċerti plejers (kif kien stqarr Pioli) rebħa, pareġġ u telfa xorta!!
L-għada, it-Tnejn, bdiet ir-rivoluzzjoni kompleta minn Cardinale... tajjar lil kulħadd - Furlani, Moncada, Tare u Allegri! Iżda Alla jbierek żamm lil Ibrahimovic (naturalment mexa fuq il-pariri tiegħu) - konvint li Zlatan hu parti l-ħażina tal-klabb!! Issa dan is-suppost diriġent ta’ RedBird irid jibni l-iskwadra imma se jmur għal 6 ġimgħat fl-Istati Uniti biex jikkummenta xi partiti tat-Tazza tad-Dinja!! Tifhimhom dawn il-bużullotti!! Imma dwar dawn l-aspetti nitkellmu f’edizzjoni oħra tal-kronaka, għax ma nieqafx.
Il-ġimgħa l-oħra, qabel Genoa-Milan, Allegri u Tare bi qbil mal-plejers marru kollha f’irtir mill-Erbgħa, u din il-ġimgħa l-plejers xtaqu li jmorru irtir mill-Ġimgħa. Imma ma sewa għalxejn! Forsi kien hemm min aktar moħħu biex ikollu skuża ħalli jitlaq?!! Min jaf? Iż-żmien jagħtina parir. Emblematika kienet il-frażi ta’ Allegri wara l-partita (skont Claudio Raimondi ta’ Mediaset): “...fil-Milan hemm bżonn ta’ mħabba u passjoni fil-livelli kollha tal-klabb”!! Frażi li tfisser ħafna u ħafna!! Bħalma sinifikattiva kienet ix-xena tal-gowl ta’ Saelemaekers: mid-diriġenti kollha preżenti, Tare BISS qam jifraħ!!
Kronaka. Il-Milan fetħu tajjeb, tant li wara 2’ pass bir-ras ta’ Gimenez lejn Alexis SAELEMAEKERS, li waħdu quddiem Caprile, xeħet fix-xibka. Iżda fl-20’ minn korner, Gennaro BORRELLI antiċipa lil Gimenez, u tefa’ wara Maignan. Fis-37’ Mike ħarablu ballun faċli, imma Tomori kklerja... kien l-uniku żball għax mill-bqija kien eċċellenti b’diversi saves importanti.
It-2 taqsima bdiet b’Pulisic flok Gimenez... li rnexxielu ma jiskorjax gowl f’kampjonat sħiħ!! Fis-56’ żball bejn Gabbia u Tomori, ġab lil Esposito waħdu, salva Pavlovic, ammonit. Minuta wara, wara frikik ieħor, Maignan reġa’ salva imma bid-difiża kollha tħares, il-ballun ġie għand Juan RODRIGUEZ li bir-ras tefa’ fix-xibka... clamoroso a San Siro!! issa bir-Roma u l-Como fil-vantaġġ, Milan barra miċ-CL. Inkredibbli anke s-similarità kif qlajna l-aħħar 3 gowls (anke vs Genoa) – bid-difiża konfuża, dik li kienet l-aqwa difiża tal-kampjonat!
Fit-62’ daħlu Modric, Fullkrug u Athekame flok Jashari, Nkunku u Tomori. Il-Milan xeħtu kollox fuq l-attakk, imma fuq wara miftuħ beraħ. 3 ċansijiet kbar: fit-63’ Pulisic bir-ras barra, fit-68’ xutt ta’ Rabiot barra, u fit-72’ reġa’ Pulisic li kien sfortunat. Minuta wara Maignan salva darbtejn fuq Borrelli u Zappa. Fil-75’ Leao lejn Rabiot, waħdu, imma għolla l-ballun fuq il-lasta. Fil-81’ pprova Modric għalxejn, u 3’ wara reġa’ kien Pulisic li daħal fil-kaxxa imma xxuttja għoli. Fis-86’ Mendy waħdu quddiem Maignan, li salva mirakolużament. Fit-93’ ħarba oħra ta’ Leao lejn Fullkrug li kien antiċipat... bir-riżultat ma jinbidilx!

L-istatistika: xuttijiet 16-25 (fil-lasti 3-10); fawls 8-9, korners 5-5, bil-logħob ikun 48.4% - 51.6%... fejn jispikkaw id-25 xutt tal-Cagliari u 10 fil-lasti!! li tikkonferma kemm kienu aħjar l-avversarji!
L-aħjar kien Maignan! (li tikkonferma kemm it-tim lagħab ħażin), u suffiċjenti Saelemaekers u Rabiot, b’Modric jidħol fil-61’ b’maskra protettiva. Pulisic u Leao ppruvaw, imma meta l-logħob ma jridx impossibbli tiskorja.
Il-Milan lagħbu hekk (3-5-2): Maignan; Tomori (61’ Tomori), Gabbia, Pavlovic; Saelemaekers, Fofana (69’ Leao), Jashari (61’ Modric), Rabiot, Bartesaghi; Nkunku (61’ Fullkrug), Gimenez (46’ Pulisic). Riservi: Pittarella, Torriani, De Winter, Estupinan, Odogu, Vladimirov; Loftus-Cheek, Ricci, Sardo; Balentien.

Kurżitajiet.
KONTESTAZZJONI QAWWIJA. Il-Curva Sud u oħrajn, li kkontestaw is-soċjetà qabel, waqt u wara l-partita vs Cagliari, komplew bil-protesta ħarxa tagħhom bi strixxun quddiem il-lukanda f’Milan fejn kien alloġġjat il-propjetarju: “CARDINALE GO HOME: SHAME!”. U tpoġġew tnejn oħra, wieħed mill-Old Clan Milano barra San Siro: “GIOCATORI E SOCIETÀ: TUTTI COLPEVOLI”, u l-ieħor quddiem Casa Milan: “ALLEGRI E TARE UNICI UOMINI VERI. IBRA MALE ASSOLUTO”.
FLOKK ĠDID. Ftit jiem qabel l-aħħar partita, bil-kollaborazzjoni tal-PUMA, għad-9 sena konsekuttiva, ippreżentaw il-flokk il-ġdid... li żgur ma ġabx fortuna! Ta’ min jirrimarka li fost il-plejers li rrekklamawh kien hemm Leao, Modric u Pulisic, li min għal xi raġuni jew oħra mhux ċerti li ser jibqgħu. U wara r-riżultat ta’ Milan-Cagliari aktar u aktar!!
PLAYER TRADING. Kif nafu, id-diriġenti attwali, partikolarment Furlani, kien aktar moħħhom fil-player trading – dik li ċċedi u takkwista ħafna plejers (b’mod definittiv, self jew jagħlaq il-kuntratt) ħalli żżomm il-bilanċi pożittivi. Interessanti li f’dawn l-aħħar 3 snin saru 34 akkwist u 57 plejer ċedut għal 91 operazzjoni totali!! Dawn kienu: 11-il akkwist u 17 ċeduti fl-istaġun 2023/24; 11-il akkwist u 18 ċeduti fl-2024/25; u 12-il akkwist u 22 ċeduti fl-2025/26. Plejers trattati qishom shares fil-borsa... bir-riżultati jista’ jarahom kulħadd!!
ABRAHAM. L-eks Milanista Tammy irnexxielu jirbaħ l-4 kompetizzjonijiet Ewropej wara li Aston Villa (tal-kowċ Emery li rebaħha rekord ta’ 5 darbiet) għelbu lil Friburgo 3-0 fil-finali tal-Europa League. Abraham rebaħ iċ-Champions League u s-Supercoppa UEFA maċ-Chelsea fl-2020/21 u 2021/22 rispettivament; il-Conference League mar-Roma fl-2021/22 u issa l-Europa League ma’ Aston Villa. B’hekk sar it-tieni plejer li rnexxielu jwettaq dan ir-rekord prestiġjuż wara l-Brażiljan Emerson Palmieri.

Ritratti, (fuq): il-gowl ta’ Saelemaekers wara biss 2’, u l-pareġġ minn Borrelli fl-20’; (nofs): il-gowl deċiżiv ta’ Rodriguez fil-57’; Maignan l-aħjar tal-Milan; u Modric dispjaċut wara l-partita; (taħt): Allegri waqt il-partita u li pprova li seta’ bl-iskwadra li kellu; u ż-żewġ strixxuni mit-tifosi Milanisti - dak vs Cardinale mal-lukanda fejn kien alloġġjat, u favur Allegri u Tare ma’ San Siro!

Kwalunkwe opinjoni espressa minni mhux bilfors hi l-istess tal-Milan Club Malta 1979.

Bongu Milanisti,
Għal dawk li ordnaw il-flokkijiet, dawn issa waslu. Ibgħatulna messaġġ privat u ngħidulkom minn fejn tistgħu tiġbruhom.
Grazzi ❤️🖤

Kronaka Milanista minn Frans Deguara...

Genoa-Milan 1-2 - rebħa importanti u ta’ karattru

Fis-37 programm tas-Serie A, il-Ħadd, 17 ta’ Mejju, 2026 – u fl-12:00!! (flimkien ma’ 4 partiti oħra) – il-Milan ġew ospitati mill-Genoa u rebħu 1-2... 3 punti li reġgħu poġġew lill-Milan fit-3 post, flimkien ma’ Roma, b’70 punt, 3 taħt Napoli u 2 fuq Como u Juventus. Biex issa jonqoshom 3 punti fl-aħħar partita biex jaċċertaw post fiċ-Champions League.
B’Leao, Saelemaekers u Estupinian sospiżi, imma b’Modric fuq il-pankina (kien lest jidħol b’maskra protettiva, u ta’ leader li hu baqa’ jinċita lil sħabu tul il-logħba kollha), Allegri rnexxielu jikkompatta t-tim u l-Milan taw wirja tajba u ta’ karattru wara l-wirjiet diżastrużi tal-aħħar partiti. Mhux biss, anke wara x-xniegħat (jew veritajiet!) li ħarġu li Max u Ibra kienu tlewmu sew. Tant li f’Genova d-diriġenti kollha kienu preżenti (anke Cardinale), ħlief Ibra!, li kien impenjat fuq affari (personali jew ta’ RedBird?!). Infatti s’issa, Ibra bħala diriġent aktar kien ta’ ħsara milli ta’ ġid għall-Milan, l-aktar b’dawk il-vidjows provokattivi u eċċentriċi tiegħu! Veru li kien plejer kbir, imma bħala diriġent...
Kronaka. L-1 taqsima kienet xi ftit jew wisq b’logħob kajman – tipika ta’ nofsinhar fis-sħana ta’ Mejju! – bil-Genoa forsi kemm kemm aħjar. Imma wara l-intervall il-Milan ħarġu aħjar, tant li fit-48’, wara pass żbaljat ta’ Amorim lejn il-gowler Bijlow, daħal Nkunku, u ġie mwaqqa’ fil-kaxxa. Penalty ċar. Inkariga minnu Christopher NKUNKU u xeħet lill-gowler in-naħa oposta fil-51’. Fil-53’ il-logħob kellu jieqaf għal 5’ minħabba d-duħħan tal-gassijiet mill-curva Genoana (u anke munita li nġabret mir-referì Sozza li twaddbet lejn Maignan). Fit-63’ fawl ieħor ta’ Gabbia fuq Colombo, irriskja, iżda Sozza ammonixxa lil Vitinha minħabba protesti plateali. Fit-68’ daħlu Ricci u Fullkrug flok Fofana u Gimenez, u fil-75’ Pulisic u De Winter minflok Nkunku u Tomori (ammonit ukoll). Fil-81’ kumbinazzjoni bejn Fullkrug u Pulisic li ta lejn Zachary ATHEKAME, li b’xutt sabiħ minn tarf il-kaxxa għeleb lil Bijlow. Fit-83’ ġennata ta’ Jashari li qassam lura bil-ballun jiġi għand Ekhator, imma Maignan salva mirakolożament. Fil-85’ daħal Loftus-Cheek flok l-istess Jashari. Fis-87’, wara taħwida fil-kaxxa, Johan VASQUEZ naqqas id-distakk għall-Grifoni. Iżda wara, il-Mlian kellhom diversi ċansijiet, fosthom ta’ Pulisic li fil-100’ inġab waħdu minn Fullkrug quddiem Bijlow, li wettaq miraklu ieħor.
L-istatistika: xuttijiet 11-8 (fil-lasti 2-6); fawls 8-19, korners 4-4, bil-logħob ikun 62.2% - 37.8%... fejn jispikkaw id-19-il fawl kontra l-Milan, bir-referì Sozza ikun iżjed tolleranti mal-Grifoni, u minn aspett ieħor il-Milan urew ċerta grinta, li kienet nieqsa f’dawn l-aħħar logħbiet.
L-aħjar kienu Nkunku u Athekame, flimkien ma’ Rabiot, Maignan, Pavlovic, Gabbia, u Jashari (apparti dak il-ballun lura fl-aħħar! Naħseb l-aħjar wirja tiegħu dan l-istaġun). Anke Pulisic u Fullkrug daħlu tajjeb.
Il-Milan lagħbu hekk (3-5-2): Maignan; Tomori (76’ De Winter), Gabbia, Pavlovic; Athekame, Fofana (68’ Ricci), Jashari (85’ Loftus-Cheek), Rabiot, Bartesaghi; Nkunku (76’ Pulisic), Gimenez (68’ Fullkrug). Riservi: Terracciano, Torriani, Odogu, Modric, Balentien, Sardo u Vladimirov.

Kurżitajiet.
CARDINALE. Fl-14 ta’ Mejju, f’Londra, il-propjetarju Gerry Cardinale, iltaqa’ ma’ Furlani, Ibrahimovic, Massimo Calvelli (kunsillier ta’ AC Milan) u Francesca Montini (chief brand officer tal-klabb). Ġie diskuss l-andament tal-istaġun, il-futur ta’ Furlani, u l-istruttura soċjetarja. S’issa l-unika ċertezza hi li se jitlaq Igli Tare bħala Direttur Sportiv, għalkemm jista’ jkun li jitilqu oħrajn ukoll.
PROTESTA. Il-protesta f’San Siro waqt il-partita Milan-Atalanta kontra Furlani daret id-dinja sportiva kollha, fosthom il-ġrunal Ġermaniż Kicker u dak Ingliż The Guardian, li ffokalizzat anke fuq in-nostalġija tat-tifosi Rossoneri għal Paolo Maldini bħala diriġent. Issemmiet ukoll il-petizzjoni kontra Furlani, li qabżet il-50,000 firma! A propożitu ta’ Furlani, waqt il-protesta iebsa tal-Curva bil-mowbajls “GF OUT”, Giorgio deher jitbissem. Huwa spjega “minħabba t-tensjoni u l-istress tal-partita”.
TIFOSI. Veru li hu dejjem diffiċli titkellem inġenerali għat-tifosi kollha, għax is-sapporters tal-Milan huma miljuni fuq miljuni mad-dinja kollha. Imma hija evidenti l-qasma bejn it-tifosi, dawk hard core li jmorru regolarment San Siro (u anke fi grawnds oħra), u dawk li jassistu għal xi partita kultant. Emblematika kienet l-immaġini li xxandret fuq l-iskorbord waqt il-partita, bl-iskor ta’ 0-3 għall-Atalanta, meta dehru missier u ibnu kuntenti u jitbissmu lejn il-kameras!! U dan meta kien hemm grawnd sħiħ irrabjat għat-tim!! Ċarissima d-differenza tas-sentimenti tat-tifosi mgħaddbin għat-tim u dawk is-sapporters “turisti” li jqattgħu ftit siegħat fi grawnd li fih ra partiti storiċi u Campioni indimentikabbli!!
ALLEGRI-IBRA. Skont il-Corriere della Sera, ir-rapporti bejn Massimiliano u Zlatan huma ineżistenti wara battibekk aħrax bejniethom wara t-telfa man-Napoli fil-bidu t’April. Uffiċjalment ix-xintilla kienet dwar it-3 gowler għall-istaġun li ġej. Imma fir-realtà r-raġuni prinċipali kienet li Allegri wera d-diżappunt kbir tiegħu bil-merkat ineżistenti ta’ Jannar, u li Ibra (li sar ħabib kbir tal-eks Cassano li litteralment il-ħin kollu jinsulta lil Allegri u Leao) baqa’ jżomm kuntatt personali ma’ xi plejers (fosthom Leao u Fofana) u jagħtihom struzzjonijiet kif għandhom jilagħbu!!
SINNER. Jannik reġa’ għamilha! Il-Ħadd, 17 ta’ Mejju, rebaħ ukoll il-Master Open tat-tennis fil-Foro Italico f’Ruma meta għeleb lil Casper Ruud fil-finali, u ġie ppremjat mill-President Taljan Sergio Mattarella u l-eks tennista Adriano Panatta, li rebaħ l-istess unur propju 50 sena qabel!! Sinner kellu żjara simpatika minn Paolo Maldini propju l-Ħamis, 14, biż-żewġ Milanisti jitkellmu anke fuq is-sitwazzjoni preżenti tat-tim!

Il-partita li jmiss, l-aħħar waħda tal-kampjonat hi: Milan-Cagliari, li se tintlagħab il-Ħadd, 24 ta’ Mejju, fid-20:45 (flimkien ma’ 4 partiti oħra).

Ritratti, (fuq): il-fawl ta’ Bijlow fuq Nkunku, u l-penalty mogħti perfett minn Christopher fil-51’; (nofs): il-gowl sabiħ ta’ Athekame fil-81’ u dak ta’ Vasquez fis-87’; (taħt): Cardinale, ħdejn Tare, jassisti għall-partita; Paolo Maldini jżur lil Sinner f’Ruma u Jannik jiġi ppremjat mill-President Mattarella.

Kwalunkwe opinjoni espressa minni mhux bilfors hi l-istess tal-Milan Club Malta 1979.

Avviż Uffiċjali.

Nixtiequ ninfurmaw lill-membri u lill-partitarji li mhux ser inkunu qed niltaqgħu għall-aħħar partita ta lis-staġun nhar il-Ħadd filgħaxija minħabba avveniment politiku tal-massa li ser isir biswit il-klabb.

Din id-deċiżjoni ttieħdet wara li ħadna diversi opinjonijiet u pariri minħabba d-diffikultajiet li ser ikun hemm biex wieħed jasal sal-klabb, kif ukoll sabiex nevitaw kull tip ta’ sitwazzjoni politika.

Niskużaw ruħna għal kull inkonvenjent li dan jista’ jikkawża, iżda ovvjament din hija sitwazzjoni lil hinn mill-kontroll tagħna u aħna ċerti li tifhmuna.
Niltaqgħu lis-staġun li ġej biex flimkien nerġgħu nsegwu l-Milan, forsi anke fiċ-Champions League!

Grazzi.

Kumitat.
Milan Club Malta 1979.

FT.

Gooaalll di Athekameeee 81' ⚽️

Goaaallll 51' ⚽️

Kick off ⚽️