Lagoons Sports Club

12 އޮގަސްޓް 2026 ވަނަ ދުވަހުގެ ރޭ 22:00 ގަ ލެގޫންސް ސްޕޯޓްސް ކްލަބުގެ ބޯޑު މެންބަރުން ހޮވުމަށް ބޭއްވި ޖަލްސާގެ ތެރެއަށް، ޔޫތް މިނިސްޓްރީގެ ކުރީގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) އިތުރު ތިން މީހަކާއެކު ވަދެ، މަސްލަހަތު ނަގާލައި ހަމަނުޖެހުން އުފެއްދުމަށް ވަނީ މަސައްކަތް ކޮށްފައެވެ. މީގެ އިތުރުން، މި ސަރުކާރާ ދެކޮޅަށް ބޭނުން ކަމެއް ކުރާނެ ކަމަށާއި، ކޯޓުތަކާއި ސަރުކާރުގެ ތެރެއިން ބާރާއި ނުފޫޒު ބޭނުންކޮށްގެން ބޭނުން ކޮންމެ ކަމެއް ހާސިލުކުރާނެ ކަމަށް ބުނެ، އަޑުބަރޭ ވަނީ ތަކުރާރުކޮށް އިންޒާރު ދީފައެވެ. މީގެ ކުރިންވެސް އަޑުބަރޭ އާއި އިތުރު ދެ މީހަކު ވެގެން، ލެގޫންސްގެ މިހާރުގެ ރައީސް އިބްރާހިމް މަމްނޫނަށް މަރުގެ އިންޒާރު ދީފައިވާ މައްސަލަ ފުލުހަށް ވަނީ ހުށަހަޅާފައެވެ.
މި އިންތިޚާބަށް ހުރަސް އެޅުމުގެ ގޮތުން ދަނޑުގައި ހަރުކޮށްފައިވާ ސީސީޓީވީ ކެމެރާތަކަށް ގެއްލުންދީ، ކަރަންޓު ކަނޑާލައި، އަދި ބައެއް މެންބަރުންނަށް އިންޒާރުދީ މާރާމާރީ ހިންގުމަށް ވަނީ މަސައްކަތް ކޮށްފައެވެ. މި ހަމަނުޖެހުންތަކުގައި ބައެއް މެންބަރުންނަށް އެކިވަރުގެ އަނިޔާ ލިބިފައިވީ ނަމަވެސް، ފުލުހުންގެ އެހީތެރިކަމާއެކު ކޯޓު އަމުރާ އެއްގޮތަށް އިންތިޚާބުގެ ކަންކަން ވަނީ ކުރިއަށް ގެންގޮސްފައެވެ.
‎އެގޮތުން، ކުރިމަތިވި ތަފާތު ގޮންޖެހުންތަކާއެކުވެސް 330 އަށްވުރެ ގިނަ އާންމު މެންބަރުންގެ ބޮޑު އަގުލަބިއްޔަތުން ވަނީ ކުރިއަށް އޮތް ދައުރަށް ލެގޫންސްގެ ބޯޑު މެންބަރުން ކާމިޔާބުކަމާއެކު އިންތިޚާބުކޮށްފައެވެ.
‎އިންތިޚާބުވި ހުރިހާ ބޯޑު މެންބަރުންނަށް މަރުހަބާ ދަންނަވަމެވެ.