🇭🇰屬於香港人嘅「車」站 | 🔵車路士資訊懶人包
🇭🇰 𝐇𝐊 𝐁𝐚𝐬𝐞𝐝
🚙 每日更新，緊貼所有車聞
🔷 球隊、轉會、傷患、比賽消息、球員/教練賽前/後訪問
🗣️ 粵語/廣東話報導，簡單易明
🗓️ Est: 29 Feb 2020
🫵🏼 記得Follow我哋
29/05/2026
😟𝐖𝐡𝐨 𝐝𝐨 𝐲𝐨𝐮 𝐌𝐈𝐒𝐒 𝐓𝐇𝐄 𝐌𝐎𝐒𝐓?
當年為車路士捧起歐聯獎盃嘅我車青訓，得返RJ一個仲留守喺架車到……
其他六個人，有人闖出一片天，有人同車仔一樣，拎盡歐洲三大賽事冠軍。有人傷多過踢，亦有人繼續做轉會人球……
呢六個已離隊嘅青訓入面，你哋覺得邊個離隊較為可惜呢？有邊個可以上返車？😉
但，無論如何，𝐂𝐨𝐛𝐡𝐚𝐦.𝐏𝐫𝐨𝐝𝐮𝐜𝐞𝐬.𝐖𝐢𝐧𝐧𝐞𝐫𝐬!😆💙
——————————
🏷️
🥹𝟓 𝐘𝐄𝐀𝐑𝐒 𝐀𝐆𝐎 𝐢𝐧 𝐏𝐨𝐫𝐭𝐨...
話咁快，咁就5年喇。當年今日，你有無目睹呢個時刻？
當年，撞正疫情時期。本來每個球季其中一個令人期待嘅盛事，因應全球採取防疫同隔離措施，最後只能夠容許近14000位觀眾，進入葡萄牙波圖嘅主場。包括小編在內嘅好多位車迷，只能夠喺「公仔箱」前面為愛隊打氣。
當時，同全球一樣人心惶惶嘅，仲有車路士。
當季，撞正換帥時間。本來再上一季帶領球隊打入前四嘅林伯，新一季延續唔到呢個勢頭，最後只能夠落鑊收場，換嚟嘅係曾經帶PSG入歐聯決賽嘅杜曹。包括小編在內嘅好多位車迷，當時都係對呢位教頭「5050」。
結果，憑住呢位德國籍領隊對防線嘅調整得宜，加埋前線進攻組合火花愈嚟愈好，車路士喺聯賽成功「止血」。
更加估唔到嘅，係歐聯戰線「過五關、斬六將」。馬體會、波圖，甚至係當時嘅皇馬，我哋照樣扑低。呢個遠超當時期望值嘅表現，都令小編諗一諗：唔通，9年前嘅美夢可以再次成真？
——————————
決賽嘅對手，係好想拎到第一座歐聯獎盃嘅曼城。當時坐擁阿古路、馬列斯、迪布尼、根度簡嘅曼城，實力當然有返咁上下，佢哋亦係被睇好嘅一隊。
即使做好期望管理，小編睇住直播，好緊張嘅同時，仍然抱有一絲一絲一絲嘅希望：2012年慕尼黑嘅奇蹟，係咪可以再次發生？
42分鐘，夏域斯把握到一次單刀機會，將個波送入網嘅一刻，小編唔係好興奮，係更加緊張，心跳快到撳爆「平安鐘」都唔掂。因為感覺到，下半場準備會好難捱。
縱使對手出「0防中」陣、迪布尼中途傷出，曼城下半場嘅攻勢仍然一浪接一浪。望住愛車後防不斷走嚟走去，小編就不斷做「少男的祈禱」。
好記得RJ喺自己禁區嗰下疑似手球，真係嚇到想死；我哋嘅Dave艾斯比列古達小禁區嗰下解圍，真係嚇到飊尿；最後一秒馬列斯嗰下遠射擦楣而過，嚇到差啲暈低。
聽到全場「雞聲」嘅一刻，成個人簡直係死過返生咁。因為……終於……得咗喇！（仲記得喺簡房到大嗌，嚇到老媽子衝入嚟問：「發生咩事？無事嗎？」）
——————————
我哋兩位小編分別喺2012年同2014年開始撐車，見到愛隊面對疫情同其他困境，仍然可以「逆」流而上，仲有幸睇得返9年前「慕尼黑之夜」嘅畫面，除了感動，還是感動。
時而勢易，5年前嘅車路士，同5年後嘅車路士已經面目全非。無論陣容、領隊、管理層、班主，全部都唔同晒。再望呢個post，不禁有啲諷刺……
而家嘅車路士，確實令到小編有種幾陌生嘅感覺。陌生嘅唔係單純成績嘅倒退，而係當年我哋鍾意嘅車路士，面對逆境嘅嗰份鬥志、嗰團火，唔應該係咁。
只不過幾陌生、幾辛苦、幾折磨都好，仍然改變唔到我哋兩個鍾意車路士嘅事實。呢份初心，由此至終都無變過。
「一日車迷，一世車迷。」即使由5年前嘅成功，去到5年後嘅不濟，小編們仲會為自己作為車迷而感到自豪。
——————————
🗂️：MOON SPORTS、A Decade in Blue
🏷️
28/05/2026
🥹𝐃𝐞𝐫𝐫𝐲'𝐬 𝐏𝐫𝐞𝐜𝐢𝐨𝐮𝐬 𝐌𝐄𝐌𝐎𝐑𝐘~
2026年5月4日，喺你眼中，可能係忙碌兼唔想面對嘅星期一。
但，喺18歲嘅戴利眼中，係一個難得嘅星期一，因為達成英超嘅「地標戰」。喺呢位車路士青訓球員嘅足球生涯入面，能夠為一隊付出「第一次」，相信係個難忘嘅經歷。
雖然，戴利呢個「第一次」唔係順利嘅開始，因為喺比賽途中身受重傷。當見到佢遲遲未起得返身，包括小編在內嘅車迷滿腦子都係擔心、擔心同擔心。
好在，經過治理之後，戴利最後平安無事，季尾最後幾場有份列入後備名單，相信好多車迷都好安慰，亦令小編忽發其想：有機會喺香港目睹佢一面，就好喇！
呢個看似平凡嘅第一次，係戴利「夢想成真」（A dream come true）嘅珍貴時刻，而佢選擇將呢個「大日子」，紋喺身上紀念。
衷心希望5月4日嘅「第一次」，能夠為戴利喺車路士嘅日子帶嚟更多嘅機會、更好嘅未來。
唔知道，你人生嘅「第一次」係點呢？你又會點樣記住呢個「第一次」呢？
——————————
🗂️：Jesse Derry's Instagram Story
🏷️
28/05/2026
📆2026/27英超賽程：
6月19號 香港時間下午5點/英國時間早上10點 官方公佈
The 2026/27 Premier League line-up.
Fixtures will be released on Friday 19 June, 10:00 BST. ⏰
27/05/2026
🫢𝐖𝐢𝐥𝐥 𝐄𝐧𝐳𝐨 𝐒𝐓𝐀𝐘 𝐨𝐫 𝐋𝐄𝐀𝐕𝐄?
你覺得安素應該留定走呢？關於呢個問題，有車路士隨隊記者再進一步跟望佢轉會嘅事，小編quote返原文畀大家參考：
Chelsea will ask for £120m for Enzo Fernandez this summer. The Argentina midfielder is not actively for sale and remains part of the club’s plans. However, he is exploring moves to other giant clubs, and near-PL record fee would be required.
譯文：
車路士今個夏天將為安素費蘭迪斯標價1.2億英鎊，呢位阿根廷中場球員目前並唔喺出售名單入面，仍然係球會計劃嘅一部分。但係，安素本人正考慮加盟其他大球會，而轉會費就需要接近英超轉會費紀錄。
當年安素加盟車路士嘅轉會費據報係1.07億鎊，而今次quote呢個1億2000萬鎊嘅價，到底係咪真係成功呢？盛傳嘅皇馬或者曼城，目前面對嘅環境又有無可能出得起呢個價錢呢？
你問小編，安素確實有佢嘅作用，尤其後上入楔嘅攻門愈做愈好。問題係，自從羅仙尼亞執教嘅中段期，關於佢嘅花邊新聞有多無少。即使之後都有入波同助攻，但整體上畀球迷嘅觀感已經無之前咁好。
同打工&愛情關係一樣，如果一個人本身個心都已經唔喺到，就算留住佢嘅人，又有咩意思呢？
小編唔質疑安素嘅能力同為車路士作出嘅貢獻，只係呢一切都要睇佢仲有無熱心同鬥心，繼續為呢件深藍衫作戰。如果無嘅，留佢都無意思，畢竟「勉強無幸福」~
——————————
🗂️：Nizaar Kinsella
⛓️💥：https://www.instagram.com/p/DY2MUYrsq8N/
🏷️
27/05/2026
根據BBC Sport記者Nizaar Kinsella獨家消息，因為缺乏上陣時間，門將佐真遜喺一次面對面會議中要求離隊。此前車路士曾經於一月拒絕其離隊要求，不過而家對此持開放態度。
Chelsea news: Jorgensen wants to leave Blues Chelsea news: Jorgensen wants to leave Blues
27/05/2026
根據GiveMeSport記者Ben Jacobs早兩日報導，雖然巴塞隆拿對祖奧柏度有真誠嘅興趣，並且已經進行咗一啲初步接觸談判，但車路士並唔準備將呢位。今夏，無論報價有幾高，甚至係打破世界記錄，都無法改變車路士嘅立場。
27/05/2026
根據The Independent記者Miguel Delaney於英超煞科戰前表示，皇家馬德里將出手簽下安素，知情人士透露，車路士對新特蘭嘅比賽好有可能係呢位阿根廷中場於車路士嘅最後一場比賽。
Real Madrid set to make move for Enzo Fernandez – with Manchester City interested too It is thought that the final-day fixture at Sunderland will be the Argentina midfielder’s final game for Chelsea
🫥𝐖𝐡𝐞𝐫𝐞'𝐬 𝐡𝐢𝐬 𝐒𝐇𝐎𝐎𝐓𝐈𝐍𝐆 𝐁𝐎𝐎𝐓𝐒?
今季包埋英超同世冠盃在內嘅47場各項賽事（唔包括熱身賽），戴納仔為車路士帶嚟3個入球、4次助攻，仲有5張黃牌同1張紅牌。
小編知道：一定唔關佢事，一定係件9號波衫累事，一定係，除非唔係~😉（曲）
各位車迷，你哋覺得下季戴納仔會大爆發，可以用行動「摑返我哋幾巴」，定係想同佢講：「好行唔送，祝君好運」呢？
——————————
🗂️：FotMob
🏷️
26/05/2026
根據The Chelsea Forum嘅獨家消息，古斯度已經私下告知車路士希望於今夏離隊。
該法國右閘認為自己值得一個正選席位，而下季阿朗素上任後，占士嘅右閘/右翼衛位置不可動搖，因此古斯度無明確出路。球會方面亦願意喺有利潤嘅情況吓將球員出售。
有數間法國球會及一間德國球會已正關注其情況。