09/06/2026
حیدری بلوچ فٹبال کلب میں پروفیسر ڈاکٹر منظور احمد بلوچ کی آمد اور ساتھیوں سے ملاقات
حیدری بلوچ فٹبال کلب کے سرپرست، گوادر یونیورسٹی کے پرو وائس چانسلر اور ممتاز دانشور و اسکالر پروفیسر ڈاکٹر منظور احمد بلوچ کی کلب آمد پر ایک خوشگوار اور پُروقار نشست کا انعقاد کیا گیا، جہاں انہوں نے کلب کے ذمہ داران اور دوستوں سے ملاقات کی۔
اس موقع پر حیدری بلوچ فٹبال کلب کے چیئرمین حسین بخش بلوچ نے پروفیسر ڈاکٹر منظور احمد بلوچ کو خوش آمدید کہتے ہوئے ان کی کلب أمد پر تہہ دل سے ان کا شکریہ ادا کیا۔ کلب کے سرپرست انجینئر امام بخش بلوچ, ڈاکٹر یونس بلوچ اور دیگر ساتھیوں نے معزز مہمان کو پھولوں کا گلدستہ پیش کرکے اپنی محبت اور عقیدت کا اظہار کیا۔
تقریب میں حیدری بلوچ کے جنرل سیکریٹری زرخان بلوچ، معروف ادیب و لکھاری رمضان بلوچ، شاعر عیسیٰ بلوچ اور دیگر ساتھی بھی موجود تھے، جنہوں نے پروفیسر صاحب کی آمد پر دلی خوشی اور مسرت کا اظہار کیا۔
بعد ازاں پروفیسر ڈاکٹر منظور احمد بلوچ نے ساتھیوں کے ہمراہ علی محمد محلہ، کلری، لیاری کا دورہ کیا، جہاں انہوں نے فیفا ورلڈ کپ کے حوالے سے جاری تیاریوں، سجاوٹ اور عوامی جوش و خروش کا جائزہ لیا۔ اس موقع پر انہوں نے میڈیا کے نمائندوں سے گفتگو کرتے ہوئے لیاری کے نوجوانوں کے کھیلوں سے غیر معمولی لگاؤ اور فٹبال سے وابستگی کو سراہا۔
دورے کے دوران اردو زبان کے معروف شاعر عیسیٰ بلوچ نے اپنی شاعری پر مشتمل کتابیں بھی پروفیسر ڈاکٹر منظور احمد بلوچ کو پیش کیں، جنہیں انہوں نے خوشی سے قبول کرتے ہوئے ان کی ادبی کاوشوں کو سراہا اور علم و ادب کے فروغ کے لیے ایسے اقدامات کو نہایت اہم قرار دیا۔
