Abdulaziz Dalloul تنفـسْ

أصعب شي مش إن شخص يتركك…
أصعب شي إنك بعد ما يتركك، تبدأ تعيش كل علاقة جديدة وأنت مستعد للترك.

تراقب.
تشك.
تتعلق بسرعة.
أو تنسحب قبل ما ينترك فيك.

مش لأن الشخص الجديد عمل شي…
بس لأن قلبك لسه بتعامل مع جرح قديم.

الشفاء مش إنك تنسى مين خذلك. إنك تتعلم إن اللي صار زمان…
مش لازم يصير مرة ثانية.
وإن الشخص اللي قدامك اليوم…
مش مسؤول يدفع ثمن شخص وجعك بالأمس.

⁨ في ناس حضورها بسبقها… اسم معروف، صورة قوية، إنجازات، منصب. بس أول ما تقرب منهم، بتكتشف إنه الحضور شي… والتعامل شي اخر تماما (فقاعة) .. في ناس بتعرف كيف تبين، بس ما بتعرف كيف تتواصل. ما بتسمع منيح، ما بتفهم اللي قدامها شو بده، وما بتعرف تكون واضحة. وبتطلع من التعامل معها وإنت جواتك سؤال: هو فهمني؟ هو واضح معي؟ بقدر أثق فيه؟

وبالمقابل، في ناس كل ما تقرب منهم أكثر، بكبروا بعينك أكثر. بتكتشف إنه ورا الصورة عقل حاضر، ورا الكلام فهم، ورا الهدوء ثقة، وورا التعامل احترام. بتحكي معه بتحس إنه سامعك عن جد، بتشرحله بفهم شو قصدك مش بس شو حكيت، بتختلف معه وبتضل مرتاح، وبتطلع من عنده وإنت عارف بالزبط وين واقف.

هنا الفرق. لأنه الإنسان مش بس شو بحكي عن حاله، الإنسان كمان شو بخلي الناس تحس بعد ما تتعامل معه. ممكن صورتك تلفت، واسمك يكون معروف، وإنجازاتك تفتحلك أبواب… بس اللي بخلي الناس ترجعلك وتحكي عنك باحترام وترتاحلك، هو شي أعمق: وضوحك، ثباتك، وطريقتك مع الناس.

في شخصيات مرييييحة،،، بتعرف متى تحكي، ومتى تسكت، ومتى توضح، ومتى تقول: ما بعرف. ما بتخليك معلق بمنطقة رمادية، وما بتستخدم الغموض عشان تبين أهم او الصمت عشان تبين عبقرية وهي من حوا (فاضية) . لأنه الثقة مش استعراض… الثقة بتنبني بالتعامل. من موقف واضح، من كلمة التزمت فيها، من احترامك لوقت الناس، من طريقتك وقت الاختلاف، ومن الشعور اللي بضل عند الشخص بعد ما يروح من عندك.

ولكل شخص دخل حياتنا وكان من هالنوع… الشخص اللي فهمنا بدون ما نضل نشرح، اللي سمعنا عن جد، اللي كان واضح معنا، واللي وجوده كان فيه راحة وأمان واحترام وطاقة…

شكرا من هنا لبكرة.

لأنه الناس اللي بتعرف تتعامل مع روحك قبل مصلحتها… هدول صعب تنساهم.

وإذا عندك حدا كل ما قربت منه اكتشفت إنه الحقيقة فيه أحلى من الصورة… 💙منشنه💙 ، وخليه يعرف إنه وجوده مهم بحياتك.

باختصار 🚶🏻

باختصار