05/10/2026
النهارده اليوم العالمي للمعلم وكنت بفكر:
مين أكتر معلم أثر في حياتي؟
ولقيت إني مش قادرة أختار شخص واحد… لأن الحقيقة إن كل واحد فيهم ساب جوايا أثر بشكل مختلف ❤️
فاكرة كويس أول مدرسة ادتني في أولي ابتدائي د ايه حببتني في المدرسة
فاكرة مدرسين الرياضة والعربي وخصوصا مدرس العربي اللي كان بيشرح النحو بطريقة تخليني أفهمه من أول مرة لدرجة إني ماكنتش محتاجة أذاكره بالشكل التقليدي
وفاكرة مدرس الإنجليزي… اللي نقلني من بنت كانت حاسة إنها "مش بتفهم حاجة خالص" في الإنجليزي لبنت متفوقة وبتجيب أعلى الدرجات
لكن يمكن أكتر حاجة فاكرها مش المعلومة نفسها…
فاكرة معاملتهم ليا
كانوا بيعاملوني كأني بنتهم أو أختهم الصغيرة.
كانوا بيخافوا على مصلحتي و يشجعوني ويصدقوا فيا أوقات يمكن أنا نفسي ماكنتش مصدقة في نفسي
وحقيقي أثرهم لسه موجود لحد النهارده
ناس يمكن ماعرفش عنهم حاجة دلوقتي لكن لسه بفتكرهم ولسه بدعيلهم في صلاتي
وده خلاني أفهم إن المعلم المعلم ممكن يكون سبب في إن طفل يحب مادة كان بيكرهها أو يكتشف موهبة عنده أو يستعيد ثقته في نفسه أو يغير نظرته لمستقبله بالكامل
وأوقات المعلم نفسه مايعرفش حجم الأثر اللي سابه
ديننا رفع مكانة العلم وأهله قال تعالى:
﴿يَرْفَعِ اللَّهُ الَّذِينَ آمَنُوا مِنكُمْ وَالَّذِينَ أُوتُوا الْعِلْمَ دَرَجَاتٍ
وقال رسول الله ﷺ:
«من سلك طريقًا يلتمس فيه علمًا، سهّل الله له به طريقًا إلى الجنة» رواه مسلم
ففضل المعلم مش بس في إنه علمنا درس هنفتكره في الامتحان فضله الحقيقي في شخصية كاملة ساعد في بنائها
لكل معلم ومعلمة كانوا سبب في علم أو ثقة أو نجاح، أو كلمة طيبة في وقت احتجناها:
جزاكم الله عنا خيرًا وبارك في أعماركم وأعمالكم وجعل كل علم علمتموه لنا في ميزان حسناتكم 🤍
ولو في معلم أو معلمة لسه فاكرهم لحد النهارده
ماتنساش تدعيلهم ودي تكون أجمل هدية توصلهم
#المعلم #مدرسة
