Yasmin Sahar

اتوار... اپنے گھر کو خوشیوں سے بھرنے کا دن

اتوار صرف ایک چھٹی کا دن نہیں
یہ ان لمحوں کا نام ہے جو ہم اپنے گھر والوں کے ساتھ گزار سکتے ہیں۔

اگر میاں بیوی کے درمیان کوئی ناراضی ہے تو آج مسکرا کر بات شروع کیجیے۔
اگر بچے آپ کی توجہ چاہتے ہیں تو آج ان کے ساتھ ہنسیے، کھیلیے اور ان کی باتیں دِل سے سنیے۔
اگر ماں باپ خاموش بیٹھے ہیں تو چند لمحے ان کے پاس بیٹھ جائیں، یقین مانیں آپ کا وقت اُن کے لیے دنیا کی سب سے قیمتی دولت ہے۔

ضروری نہیں کہ خوشی منانے کے لیے بہت زیادہ پیسے ہوں۔
گھر کی بنی ایک پیالی چائے، سب کا ایک ساتھ بیٹھ کر کھانا، ایک چھوٹی سی ڈرائیو، پارک کی سیر یا دل کھول کر ہنسنا بھی زندگی کی خوبصورت یادیں بن جاتا ہے۔

یاد رکھیے...
گھر اینٹوں سے نہیں، محبت سے بنتا ہے۔
اور زندگی بار بار نہیں ملتی، اس لیے اپنے گھر والوں کے ساتھ ہر خوبصورت لمحہ جی بھر کر جئیں۔

آج اپنے موبائل کو کچھ دیر کے لیے ایک طرف رکھ دیجیے...
اور اپنے گھر والوں کو یہ احساس دلا دیجیے کہ وہ آپ کی زندگی کی سب سے بڑی نعمت ہیں۔

اللہ تعالیٰ ہر گھر میں محبت، سکون، صحت، رزق کی فراوانی اور ہمیشہ قائم رہنے والی خوشیاں عطا فرمائے۔ آمین۔

#اتوار #بچے #محبت #سکون #زندگی

پاکستان کے خوبصورت سیاحتی علاقے
ہماری قومی پہچان ہیں۔ ہر سال لاکھوں سیاح مری، ناران، کاغان، سوات، گلگت، ہنزہ اور دیگر علاقوں کا رخ کرتے ہیں۔ ان سیاحوں کی آمد سے مقامی لوگوں کا روزگار چلتا ہے، ہوٹل انڈسٹری ترقی کرتی ہے اور ملکی معیشت کو بھی فائدہ پہنچتا ہے۔
لیکن ایک مسئلہ ہر سال شدت اختیار کر جاتا ہے، اور وہ ہے ہوٹلوں کے کرایوں میں بے جا اضافہ۔ موسم شروع ہوتے ہی کئی ہوٹل عام کمروں کے بھی 15 ہزار، 20 ہزار بلکہ اس سے زیادہ کرایہ وصول کرنے لگتے ہیں، جس سے متوسط طبقے کے لیے سیاحت ایک خواب بن کر رہ جاتی ہے۔
ہوٹل مالکان کا مناسب منافع کمانا ان کا حق ہے، کیونکہ ان کے بھی اخراجات ہوتے ہیں، لیکن منافع اور ناجائز منافع میں فرق ہونا چاہیے۔ اگر قیمتیں مناسب ہوں گی تو زیادہ سیاح آئیں گے، ہوٹل زیادہ دن بھرے رہیں گے اور کاروبار بھی مزید بڑھے گا۔
میری حکومتِ پنجاب، خصوصاً وزیراعلیٰ محترمہ مریم نواز صاحبہ سے گزارش ہے کہ جس طرح انہوں نے مری اور دیگر سیاحتی علاقوں کی خوبصورتی، صفائی اور سہولیات پر توجہ دی ہے، اسی طرح ہوٹلوں کے کرایوں کے لیے بھی ایک مناسب پالیسی متعارف کروائی جائے تاکہ سیاحوں کا استحصال نہ ہو اور ہوٹل مالکان کا کاروبار بھی خوش اسلوبی سے چلتا رہے۔
آئیے ہم سب مل کر ایسا ماحول بنائیں جہاں سیاح اطمینان سے سفر کریں، مقامی لوگوں کا روزگار بڑھے، ہوٹل مالکان کو بھی مناسب آمدنی حاصل ہو اور پاکستان کا سیاحتی شعبہ مزید ترقی کرے۔


#سوات

پردیسی بھائیوں کے لیے جو جا رہے ہیں یا جو پردیس میں ہیں سب کے لیے یہ تحریر ہے

آج ایک ویڈیو دیکھی جس میں بتایا جا رہا تھا کہ ایک پاکستانی رائڈر کو ایک بچے کو چھونے کی وجہ سے سزا، نوکری سے برطرفی اور پھر ڈیپورٹ کیے جانے کا سامنا کرنا پڑا۔ یہ دیکھ کر بہت دکھ ہوا، لیکن ساتھ ہی یہ احساس بھی ہوا کہ ہر ملک کے اپنے قوانین ہوتے ہیں، اور ان کا احترام کرنا ہم سب پر لازم ہے۔
مجھے آج بھی اپنے والد صاحب کی ایک بات یاد ہے۔ وہ بتایا کرتے تھے کہ تقریباً ساٹھ، ستر سال پہلے ایک سعودی شخص اپنی ننھی سی بیٹی کو اپنی دکان پر لایا۔ بچی بہت پیاری تھی، والد صاحب نے محبت سے اس کے گال پر ہلکی سی تھپکی دی تو وہ شخص فوراً ناراض ہو گیا۔ تب والد صاحب کو احساس ہوا کہ ہر معاشرے کی اپنی حدود اور اپنے قوانین ہوتے ہیں۔
میں خود بھی پردیس کی تنہائی محسوس کر چکی ہوں۔ جب مہینوں اپنے بچوں سے دور رہی تو ہر معصوم بچے میں مجھے اپنے ہی بچوں کا چہرہ نظر آتا تھا۔ شاید اسی کیفیت سے بہت سے پردیسی بھی گزرتے ہوں، جو اپنے بچوں کی یاد میں جذباتی ہو جاتے ہیں۔
میری تمام پاکستانی بھائیوں سے ایک مخلصانہ گزارش ہے... چاہے بچہ ہو یا بچی، دو سال کا ہو یا دس سال کا، کسی بھی بچے کو ہاتھ نہ لگائیں، گود میں نہ اٹھائیں اور نہ ہی محبت میں گال تھپتھپائیں۔ صرف مسکرا دیں اور اپنے کام پر توجہ دیں۔
پردیس کی کمائی آسان نہیں ہوتی۔ کسی نے زمین بیچی ہوتی ہے، کسی نے زیور، کسی نے قرض لیا ہوتا ہے، تب جا کر روزگار کا یہ موقع ملتا ہے۔ خدارا ایک لمحے کے جذبات کو اپنی برسوں کی محنت، اپنے خاندان کی خوشیوں اور اپنی عزت پر بھاری نہ پڑنے دیں۔
اللہ تعالیٰ تمام پردیسی پاکستانیوں کو اپنی حفاظت میں رکھے، ان کے رزق میں برکت عطا فرمائے، انہیں ہر مشکل سے محفوظ رکھے اور عزت و سلامتی کے ساتھ اپنے پیاروں سے ملائے۔ آمین۔ 🇵🇰🤲
#احتیاط #پاکستان #