Because You Deserve

🚩 مقاومة الانسولين وحساسية الانسولين : 5

🔹️التحاليل ال ممكن تعمليها عشان تتاكدي عندك مقاومة انسولين او لا :
- تحليل سكر الصيام ( fasting Blood Glucose ) : بس عيب التحليل ده انه ما بظهر مقاومة الانسولين الا بعد تطور شديد وتبقي في مراحلها الاخيرة .
-(HOMA-IR) : ده افضل واصح تحليل ممكن تعمليه وبيكشف عن مقاومة الانسولين في مراحلها الاولي .
- تحليل السكر التراكمي : ( HbA1C ) .

🔹️طيب هنا (عن طريق المنشورات الفاتت) انتي عرفتي كيف تتخلصي من مقاومة الانسولين لو عندك ، طيييب كيييف تحمي نفسك منها اساسا :
- اول شي سببها الرئيسي شنو هي السكريات ف لو نحنا بعدنا منها (وخليناها مره مره كل شهر) وما كترنا منها واكلنها يوميا كده بنحمي نفسنا من المشكله دي اساسا .
- التوتر والنفسيات نبعد منهم او نقلل منهم كده برضو بنحمي نفسنا .
- الرياضة وعدم الخمول : (وهنا انا ما قاصد يوميا تتمرني ، 3 الي 4 ايام في الاسبوع وكل يوم لمدة 40 دقيقة - لساعة) كافية جدا تحميك من امرض كتيره وبالعكس كمان ح تحسن من صحتك ونفسياتك .

🔹️اخر نقطة مهمة : انو مقاومة الانسولين هي شي كبير بس علاجها في يدك وبرضو انك تتجنبيها في يدك وحتي هي عندها مراحل من بسيطه وممكن تتلحق وممكن تطور كمان تعمل المشاكل ال قلنا عليها في المنشورات الفاتت (من سكري ..الخ) بس دي في مراحلها الاخيرة والمطورة شديد وعشان تصل المراحل دي ما بسرعة بتاخد فتره زمنيه (كم سنة يعني من 5 - 30 سنة) عشان تتفاقم بس ده بيعتمد علي (تظهر متين او تتفاقم وتبقي ظاهرة) : جيناتك يعني عندكم قابلية السكري كتيره في العائلة + كمية السكر ال كنتي بتاخديها من وانتي صغيره .

🚩 مقاومة الانسولين وحساسية الانسولين : 4

❗طيب مقاومه الانسولين ممكن تحصل نتيجة لزياده نسبه الدهون في الجسم او الوزن الزائد❗.

# العلاج : عشان نعالج مقاومة الانسولين ف نحنا مفروض نزيد حساسية الخلايا حقتنا للانسولين وذلك بيتم عن طريق :
❗ الرياضة (وبالاخص تمارين المقاومة ال هي بوزن الجسم او عن طريق تمشي جيم وترفعي اوزان) : طيب ليه قلنا تمارين المقاومة وما قلنا تمارين الكارديو (زي المشي ، الجري ، نط الحبل ، الزومبا) لانو تمارين المقاومة بتساعد جسمك انو يبني خلايا جديدة ف بكده الانسولين ح يلقي خلايا جديدة يدخل ليها المغذيات والسكر (وبكده تكوني اتخلصتي من الانسولين العالي ال بدون فايده + قللتي نسبه السكر في الدم + المغذيات رجعت تاني تخش لجسمك وخلاياك) .
❗ تقللي التوتر و التفكير الزائد والتنشنه والنفسيات : ليه عشان الحاجات دي بتخلي الجسم يفرز هرمون اسمه الكرتيزول (هرمون بيفرزه الجسم في حالة التوتر والاجهاد الشديد ح نتكلم عنه وعن النفسيات واثرها لقدام بالتفصيل ان شاء الله) والهرمون ده بيخلي جسمك براه يتنج سكر من غير حتي ما تاكلي شي (سكر من الكبد وبهدم العضلات وبالاصح البروتينات الجوه العضلات ويحولها لسكر) ف بكده انتي حتي من غير تاكلي جسمك فيه نسبه سكر ف الانسولين برضو ح يطلع .
❗ تبدي تنقصي وزنك ف حاله وزنك زائد (يعني دهون زائده ف اماكن مفروض ما تكون فيها زي البطن مثلا) : لانه سبب رئيسي لمقاومة الانسولين الوزن الزائد لانو الدهون بتمنع الانسولين يفتح الخلايا ويدخل الغذاء ليها .
❗النوم : توقفي سهههر لانو السهههر برضو بيرفع هرمون الكرتيزول + بيجوعك ويخلي نفسك دايما تاكلي حاجه فيها سكر .
❗الصيام : طيب ليه : عشان وانتي صايمه اول شي ماف اكل دخل جسمك ف بالتالي سكر الدم ما ح يرتفع ف بالتالي الجسم ما محتاج يفرز انسولين نهائي (كده البنكرياس ح يرتاح وحتي نسبه الانسولين العالية ف الجسم ح تبدا تقل وترجع لنسبتها الطبيعية) + وانتي ما اكلتي جسمك محتاج طاقة عشان يشتغل ف حايبدا يحرق من الدهون المخزنة عشان يجيب الطاقة دي .
❗تبدي توقفي خالص ونهائيا كل السكريات المصنعه : من سكر ابيض وبني وحلويات وبارد ..الخ + تقللي او توقفي وده الاحسن العيش و المعجنات والبيتزا والمخبوزات واي شي معمول من الدقيق الابيض .
❗ تبدي تعملي دايت وتركزي علي انواع الدايت المنخفضة الكارب (الكربوهيدرات او النشويات) : زي الكيتو او اللوكارب (ح نتكلم بالتفصيل لقدام باذن الله) + تزودي في اكلك من كميه البروتين والدهون الصحية والخضروات .
❗تزودي من اكلك للخضروات : ليه عشان فيها الياف بتساعد علي زياده حساسية الانسولين ف لو حساسية الانسولين زادت فبالتالي طبيعي مقاومة الانسولين تقل .
❗خل التفاح + الاميغا3 : ليهم اثر كبير في انو يقللو مقاومة الانسولين .

🚩 مقاومة الانسولين وحساسية الانسولين : 3 :

🔹️اسباب مقاومة الانسولين (وهي برضو اسباب ضعف حساسية الانسولين) :
- تناول السكريات بكثرة (سكر ابيض ، بني ، حلويات ، مشروبات غازيه) .
- تناول النشويات المخففة والمعالجة زي العيش المعجنات والفطائر والبيتزا (الدقيق الابيض عموما) وعموما كل انواع الوجبات السريعة والجاهزة .
- قلة النشاط وخصوصا النشاط الرياضي والحركة (الخمول) .
- الاكثار من تناول الفاكهة والكارب حتي الصحي ممكن يسبب المشكله دي (هنا ركزي في كلمه اكثار دي يعني المبالغة وما يكون في اعتدال) .
- انو اليوم كله تكوني بتاكلي و وجباتك كتيره وما بين الوجبات اللخبطه والقزقزه تكون كتيره(يعني لو انتي بتاكلي فطور وغدا مثلا لكن في شاي صباح بي بسكويت والنهار في جبنه بي حلاوه ، فشار ..الخ او اندومي وشاي المغرب برضو دي كلها وجبات علي فكره ف احسبي نفسك كده قاعده تاكلي كم مره ونركز في حتت انو الشاي والقهوه ف الاغلب ح يكونو بسكر غير الحاجات المعاهم) .
- النفسيات والتوتر والاكتئاب برضو ممكن يسبب المشكله دي (كيف ح نتكلم عنها لقدام لمن نتكلم عن النفسيات واثرها الكبير علي صحتنا) .
- السهههههر (وده سبب مشااااكل كتيره شديد شديد) .

🔹️مقاومه الانسولين ممكن تؤدي الي :
-السكري بكل انواعه (الاول ، الثاني ، الثالث) .
- تكيس المبايض .
- امراض القلب .
- سبب لعدم زياده الوزن .
- وسبب ايضا في عدم نزول الوزن او النزول بصورة بطيئة جدا .

🚩 مقاومة الانسولين وحساسية الانسولين : 2

#اعراض مقاومة الانسولين (تنبيه صغير هنا انو بعض الأعراض دي بتتشابه مع اعراض امراض تانيه ، فالتحاليل هي ال حتاكد عندك او لا ، بس دي اغلب الاعراض الشائعة ال لو اتلقت معناها احتمال كبير انك بتعاني من مقاومة الانسولين) :
🔹️ تلقي نفسك بتزيدي فجأة من نفس الاكل ال كنتي بتاكليه عادي وما كنتي بتزيدي منو (ده عرض غدة برضو) .
🔹️ اغلبية الزياده تكون في منطقة البطن (دهون البطن بمعني انو الكرش تبدا تظهر او تزيد) .
🔹️يحصل غمقان في لون الجلد بالذات الرقبة( وخلف الرقبة اكتر شي) + غمقان الاصابع .
🔹️ كثرة التبول وبالذات بالليل (يعمل ليك ذبذبه في النوم وما تقدري تنومي نوم عميق وبصورة متواصله) .
🔹️ احساس الجوع بيبقي كتير ومتكرر خلال اليوم (يعني بتجوعي كل ساعتين مثلا) .
🔹️ عدم الشعور بالشبع بعد الاكل (يعني بعد تاكلي ما بتحسي نفسك شبعانه وبتحسي انو لسه في حاجه ناقصة عشان تشبعي وغالبا الحاجه دي تكون حاجه مسكرة) والسبب هنا زي ما قلنا انو خلاياك الغذاء ما قادر يدخل بداخلها ف بترسل لمخك انو لسه نحنا محتاجين اكل زياده .
🔹️ رغبة في تناول الكارب (الكربوهيدرات او النشويات) بصورة زياده وطبيعي تلقي نفسك طوالي عاوزه تاكلي حاجه فيها سكر او عيش او بيتزا ...الخ من غير كده بتحسي نفسك ما اكلتي او ف شي ناقص .
🔹️ ضعف قدره تحمل الضغوطات وتقلب المزاج بصوره مستمرة (طبيعي تلقي نفسك متوتره ومتنشنه وما مركزه ودايما في حالة عصبيه وحالة زعل) .
🔹️ لمن تعملي فحوصات تلقي عندك دهون ثلاثية مرتفعه ومستوي الكولسترول (LDL) مرتفع .
🔹️ تكيس المبايض و دهون الكبد (وديل اشارة كبيره انو عندك مقاومة انسولين) .
🔹️ بطء الحرق (يعني فقدان الوزن بيتم بصورة بطيئة شديد رغم انك مثلا بتكوني عاملة دايت وبتتمرني) .
🔹️ فقدان الكتله العضلية .
🔹️ مشكله في امتصاص بعض الفاتمينات والمعادن مثل البوتاسيوم ، المغنسيوم و فاتمين C & D (هنا مرات بصنفوك علي انو عندك نقص في الحاجات دي وبتبدي تاخديها كمكملات حبوب مثلا وبرضو ما بتشوفي نتيجه او بتكون بطيئه شديد لانو هنا المشكله الحقيقه مشكله انو الجسم كيف يقدر يمتصاهم ويستفيد منهم ما مشكله نقصان فيهم) .
🔹️ حب الشباب .
🔹️ الزاوئد الجلديه (وهنا ما ال زوائد ال بتكون معاك من صغيره بس البتجي فجاه دي) .
🔹️ ال skinny fat : (برضو مؤشر كبير انه عندك مقاومة انسولين) وهي باختصار انك تكوني ضعيفه بس عندك بطن ظاهرة (دهون مركزة في منطقة البطن) .
🔹️ زياده الوزن وزياده نسبة الدهون في الجسم ونقصان نسبة العضلات ممكن يسبب المشكله دي برضو .

🚩مقاومة الانسولين وحساسية الانسولين : 1

هم حاجتين عكس بعض تماما في الاولي تمثل مشكلة صحية والتاتيه دي حاجة كويسه شديد وهي حل للمشكلة الاولي .

# حساسية الانسولين : هي عكس مقاومة الانسولين ، انو الخلايا تسمح للانسولين انو يدخل ليها المواد الغذائيه وانو جسمنا يبقي يحتاج كميه بسيطه من الانسولين لخفض مستوي سكر الدم .

# مقاومة الانسولين : حاله تكون فيها خلاياك ضعيفه الحساسيه للانسولين او انو تبدا تقاوم الانسولين .

بمعني انوو انك تاكلي ف الاكل يتحول لي جلوكوز ف يرفع سكر الدم ف يقوم البنكرياس يفرز الانسولين لخفض سكر الدم ف تقوم خلاياك ما تسمح للانسولين انو يدخل السكر والمغذيات بداخلها .

ف البنكرياس يفهم انو لسسسه سكر الدم عالي (ف محتاجين انسولين زيادة) ف يقوم ينتج انسولين زياده وبكميات كبيره(عشان يخفض سكر الدم ويرجعه لمعدله الطبيعي) وهكذا .

# ف يبقي انت هنا عندك :
١- سكر دم عالي .
٢- انسولين عالي (وم مستفيدين منه) .
٣- مغذيات (فاتمينات معادن بروتين) الجسم ما قادر يستفيد منها .

🚩الانسولين : 3

🔹️اضرار ارتفاع الانسولين عن حده الطبيعي ولفترات طويله(نتيجه ارتفاع وزياده سكر الدم) وهنا الاضرار دي ما قاصد بيها انو ارتفع ورجع لنسبته الطبيعيه لاا القصد انو يرتفع ويظل مرتفع والحكاية دي تتكرر بشكل مستمر ولفتره من الزمن :

١- بسبب تقلب ف المزاج وتنشنه وتوتر واحيانا الاكتئاب وخز او رجفه بسيطه ف الجسم ((نتيجه ارتفاع هرمونات اخري ح يتم توضيحها قدام)) .

٢- بوقف عمليات الايض ((حرق الدهون)) : بمعني طوول ما الانسولين مرتفع ف معناها سكر الدم مرتفع فالجسم ح يوقف عمليات الحرق وح يتجه انو يتعامل من السكر المرتفع ده ويخزن الفائض منه علي شكل دهون عشان يرجع نسبه سكر الدم للمعدل الطبيعي .

٣- يسبب حاله إسمها مقاومه الانسولين (( Insulin Resistance )): {شرحها بالكامل ح يكون الموضوع الجاي} :
وهي باختصار انو خلاياك م بتستجيب للانسولين وبتعمل (تكون) مناعه ضده يعني م ح تقدري تستفيدي من الغذاء الداخل لجسمك ((وهنا ده سبب احتمال انو وزنك ما بزيد رغم انك بتاكل ، وبرضو ممكن يكون سبب انو وزنك ما بينقص او النقصان يكون بصورة بطيئة)).

* يلا هنا توضيح بسيط انا قلت سبب واسباب عدم الزياده او النقصان كتيره غير مقاومة الانسولين (ح نطرق ليها لقدام) ف ما تخافي وتشخصي روحك طوالي انو عندك مقاومة انسولين .

٤- تفاقم حاله مقاومه الانسولين ممكن يؤدي الي انو جهاز المناعة حقك يبدا يهاجم البنكرياس (الجزء المسؤول من انو ينتج الانسولين في جسمك) ويحصل ليك مرض السكري ((سكري type 1)) ال هو عباره عن انوو البنكرياس م بنتج الانسولين نهائي او ينتجه بكميه غير كاافيه وهنا ح تبدي تاخدي حقن الانسولين .

٥- بيخفض حساسيه الجسم للانسولين : حساسية الانسولين دي زاتها شنو ؟؟ هي عكس مقاومة الانسولين يعني خلاياك حساسة للانسولين وبكده معناها ح تستقبل المغذيات بصورة افضل (وف كم فائده تاني ح تذكر والموضوع يتفصل اكتر مع مقاومة الانسولين) ف لمن الانسولين يكون مرتفع طوالي ح يضر بانو الخلايا ما ح تبقي حساسة ليه (للانسولين) وبكده بنضيع فوائد كتيره وممكن نصاب كمان بمقاومه الانسولين .

🔹️طيب الحل شنوو لمشكله ارتفاع الانسولين (او كيف تحافظي علي مستوي الانسولين في حده الطبيعي و تتجنبي ارتفاعه المستمر ومشاكله) :
- نبعد من الحاجات البترفعو : حلويات + معجنات + بارد + سكر ابيض او بني .

- نمارس الرياضه وبالاخص تمارين المقاومه : ليها دور كبير تقلل مستوي السكر في الدم (وكده ح نقلل إنتاج وكميه الانسولين المفرزه) + بتحسن من حساسيه الانسولين (وبالتالي تقل مقاومه الانسولين وده ح يوضح اكتر في المره الجايه باذن الله) .

- نتبع نظام اكل صحي : باختصار كده يعني ناكل الاكل الطبيعي والكويس واكلنا ما يكون كله حلويات سكريات عيش لاااا نغير ونبدا ناكل سلطات و نركز اكلنا يكون فيه بروتين بنسبه محترمه (حيواني او نباتي) ندخل مصادر الكارب الصحيه من بطاطس وبامبي (بطاطا حلوة) ونبعد من المصادر السيئة التم ذكرها فوق واخر شي ندخل الدهون الصحيه في اكلنا وما نخاف منها(سمنه او زبده حيوانية اهم شي + زيت الزيتون) .

🚩الانسولين : 2

🔹️دور الانسولين او هوو بعمل شنوو :
١- بشيل سكر الجلوكوز من مجري الدم للخلايا البتحتاج طاقه عشان تعمل (( عشان جسمنا يظل شغال بشكل طبيعي ، من تنفس لي حركه ...الخ )) .

٢- بعد يملا كل المراكز (الخلايا) المحتاجه لسكر الجلوكوز عشان تشتغل ويلقي لسه في فايض منووو ف هنا عشان يخفض نسبه السكر في الدم ويرجعها للمستوي الطبيعي ف هناا ح يخزن الباقي ف شكل دهون عشان الجسم يستفيد منها في وقت تاني وهنا نقول انو الانسولين ممكن يسبب السمنه ((كيف ح نوضح لقدام)) .

٣- ودي النقطه المهمه شديد انو بعمل كوسيط ينقل المغذيات (بروتينات ، معادن ، فايتمينات) الي العضلات والانسجه التانيه عشان تنمو وتكون كويسه وتشتغل ، ومن غير الانسولين العضلات والانسجه م حتقدر تستفيد نهائيا من المغذيات دي ( م ح تصلها اساسا او تصلها بنسب بسيطه) ف هنا ح نجي لنقطه الناس البتاكل كتير وم بتسمن (ح نوضح قدام برضو ليه) .

لحد هنا نفهم انو الانسولين هو المسؤول عن نقل الغذاء للخلايا والعضلات ، ف الخلايا والعضلات ما بتقدر تمتص المغذيات دي من غير الانسولين .

🔹️الاشياء البترفع سكر الدم و بالتالي ترفع الانسولين :
١- السكر (بكل انواعه ابيض او بني) .
٢- التوتر والسهر والاكتئاب .
٣- الحلويات والاطعمه المقليه و المشروبات الغازيه الخبز و المعجنات(الدقيق الابيض) .
٤- الاكثار من تناول النشويات (حتي لو صحية) .
٥- الاكثار من تناول الفواكه ، البلح ، العسل (نركز علي كلمة الاكثار هنا ف اي شي نكتر منه ح يضرنا ف الاعتدال افضل شي) .

🚩الانسولين : 1

طيب نجي للموضوع التاني ليه بنقول علي الاكل انو ده اكل ضار بالصحة وده اكل مفيد وصحي والتقسيم ده تم كيييف حصل سالتي نفسك السؤال ده ؟؟؟

طيب باختصار ومن غير فلسفة اي اكل انتي بتاكليه باثر علي جسمك وصحتك وبشرتك وهرموناتك وحتي نشاطك كمان ف علي حسب التاثير ده قسمنا الاكل لصحي (التاثير كان كويس) غير صحي (التاثير كان ما كويس وسبب لينا مشاكل و امراض) .

طيب عشان تفهمي ليه الاكل ده صحي او ما صحي وليه اتصنف كده خلينا في الاول نفهم تاثير الاكل علي واحد من اهم هرمونات الجسم وح تكوني سمعتي بيه كتير وخصوصا انو مربوط مع مرض السكري وهو هرمون الانسولين .

هرمون الانسولين :
الهرمون ده بيتوقف عليه كل جوانب حياتك سواء كانت صحيه ، جسديه ، نفسيه ، تمرينك ، نشاطك ، تفكيرك وتركيزك ، اعضاء جسمك وخلاياك .

علي اساس الهرمون ده بتشتغل بقيه هرمونات الجسم يا بشكل صحيح او يحصل ليك خلل فيهم .

طيب هو شنو زاتو :
هو هرمون بينتجه البنكرياس نتيجه لارتفاع مستوي السكر في الدم .

طيب لحد هنا انتي احتمال ما فاهمه انا اصلا بقول في شنووو ، ف الجاي ح يكون ف شكل قصه بوضح فيها ال بحصل شنوو من البدايه(( من بدايه ناكل)) لحد الهرمون ده بشتغل كيف وبعمل شنووو وليه باثر عليك بالشكل الكبير ده .

اوول شي يعني شنوو سكر الدم : هوو العمليه ال جسمنا فيها بحول (بكسر و بيفكك) الاكل لي سكر جلوكوز ((ال ماده ال بستفيد منه الجسم و يعتبرها مصدر للطاقه )) .

ثاني شي ختي في بالك انو اي اكل بتاكليه بيرفع سكر الدم ((ما عدا بعض انواع الدهون ، المويه ، القهوه ، الشاي ، النعناع وكلهم من غير سكر طبعا)) بنسب متفاوته ((بمعني انووو ف حاجات بترفعه بنسبه بسيطه وبشكل تدريجي و ف حاجات بترفعه بشكل كبير و بسرعة وطوالي من غير تدريج)) .

يلا انتي هنا اكلتي ف نتيجه لذلك سكر الدم ارتفع ف نتيجه لذلك البنكرياس ح يقوم يفرز هرمون الانسولين ليه عشان جسمنا يقدر يستفيد من الاكل ده + نرجع نسبه سكر الدم لوضعها ((معدلها)) الطبيعي .

ف كل م الاكل ال انتي اكلتيه رفع سكر الدم بشكل كبير ((اكلتي سكريات من حلويات+ بارد + معجنات..الخ ، اكلتي نشويات حتي لو صحية بكميات كبيره)) ف البنكرياس ح يفرز هرمون الانسولين بشكل كبير ايضا وح يستمر ف افرازه لحد م يرجع مستوي سكر الدم لمعدله الطبيعي .

يلا هنا برضو في نقطة مهمة جدا انو الهرمون ده ما بس وظيفته انو يحافظ علي نسبة سكر الدم لااا وظيفته اهم من كده كييف يلااا ؟؟ هرمون الانسولين بيعمل لينا زي المفتاح ال بفتح الباب كيف لسه ما فاهمه مش ؟؟ انه بعمل علي انه يفتح الخلايا حقت جسمنا عشان تصلها المغذيات ((من بروتين + معادن + فاتمينات ..الخ)) ف من غيره معناها ما ح نقدر نستفيد او جسمنا يستفيد من الاكل البناكله ف عشان كده هو مهم شديد ومن اهم الهرمونات كمان .

تكمله لموضوع الاكل

🚩الدهون : (( Fats )) :
اكتر عنصر مظلوم وغايب عننا كتير معلومات عنها وعن اهميتها وفائدتها وبنسمع كلااام كتير غلللط عنها .

عباره عن (( الشحم اللي بكون موجود مع اللحوم والالبان وموجود فبعض النباتات والاسماك والدجاج )) .

اهميته :
- مصدر للطاقه (( ويمكن ان يحل محل الكارب بشكل كامل بس ده في حالات معينه)) .
- مهم لصحه الجلد والشعر والبشره (( وده ح يوضح لقدام لمن نتكلم عن الفاتمينات في جزء منها الجسم ما بيقدر يمتصها بصورة كويسه الا في وجود الدهون زي فاتمين دال D)) .
- مهمة صحه الاسنان .
- والدهون الصحيه بتمنع زياده الكولسترول الضار ((LDL)) بتقلل من كميته داخل الجسم.
- مهمة جدا للمفاصل ونقصها ممكن يودي للخشونه .
- مهمة جدا جدا لانها بتخلي الجسم يقدر يمتص بعض انواع الفايتمينات الي من غيرها الجسم م بيقدر يمتصها ويستفيد منها .
- تدخل في تكوين هرمونات وانزيمات الجسم كنعصر اساسي .
- مهمة جدا لزياده وانقاص الوزن ((لقدام ح نوضح كيف باذن الله )) .

انواعها :
١- دهون مشبعه .
٢- دهون غير مشبعه .
٣- دهون مهدرجه (( زيوت الطبيخ )) .

🔹️الدهون المشبعه :
من الدهون المهمه للجسم شديد مثل (( دهون الحيوانات او الشحوم ، السمن او الزبده ، زيت جوز الهند )) ودي ممكن نستخدمها ف الطبخ وتحمير الاكل حقنا ، ونضيف ليهم الالبان والاجبان.

طلعت عنها اشاعات كتيره زمان لكن حاليا العلم اثبت عكس ذلك واثبت فائدتها وصحتها للجسم .

الاشاعات :
- انو ليها علاقه بامراض القلب والشرايين والجلطات ومنها والشركات بقت تستغل الحكايه وتطلع منتجات قليله وخاليه الدسم والزيوت النباتيه (( ودي أكبر كذبه حصلت وبالعكس مضره للجسم وح نوضح لقدام كيف وليه )) .

الحقائق :
هي ال تم ذكرها سابقا ف اهميه الدهون .

🔹️الدهون غير المشبعه :
زيت الزيتون ((يتاكل م يطبخ بيه ليه لانو مرات بتاثر بدرجات الحراره العاليه )) وال اميغا ٣ (( ال ليها فوائد كتيره و الاغلب سمع عنها او قرا عنها وح نتناولها لقدام باذن الله)) .

🔹️الدهون المهدرجه او المتحوله :
عباره عن زيوت نبات بيتم تصنيعها ومعالجتها عشان تقعد لفتره اطول (( مده صلاحيتها يعني )) ودي الضرر وكل الامراض بتجي منها مثل (( السكري النوع التاني والالتهابات ومشاكل البطن والتثدي والمفاصل وتصلب الشرايين )) .

وهي زيوت الطبيخ عموما (( ذره ، عباد شمس ، زيت النخيل ...الخ )) .

وهي نعم الشركات بتسوق ليها انها خفيفه وعندها طعم وكويسه ف الطبخ وبتدي لون حلو للاكل ما زي الحيوانيه والطبيعيه الطعمها ما مقبول أحيانا لككن ضررها كبير جدا جدا .

🚩تكمله لموضوع الاكل :

🔹️الكارب : (( Carb )) :
العنصر الخطير جدا لو تم التعامل معه بشكل خاطئ وسبب اغلب الامراض .

هو اختصار لي كربوهيدرات وهي تتكون من (نشأ + الياف + سكر) والجسم بيحولها لسكر الجلوكوز عند عمليه الهضم والامتصاص .

🔹️اهميته :
- تمنح الجسم الطاقه والتي تستخدمها جميع خلاياه وانسجته ((قلب ، كلي ، العضلات )) للقيام بوظائفها .
- ويعتبر الجلوكوز الذي ينتج منها (هضمها وامتصاصها) هو المصدر الرئيسي والمفضل لعمل الدماغ (( حسب دراسات قديمه والدراسات الجديده جات بتائج عكس كده وانو الجسم ما بيحتاجها بشكل رئيسي وح نتناول الكلام ده لقدام باذن الله )) .

🔹️انواع الكارب :
تم تقسيمها الي نوعين علي حسب حاجه اسمها الموشر الجلايسيمي :
{ glycemic index }
وباختصار هو مؤشر يوضح نسبه ارتفاع السكر في الدم ((0 - 100)) بعد تناول الكارب .

❗❗ كلما كانت النسبه كبيره معناها الكارب غير صحي وكل ما كانت اقل يعني الكارب صحي❗❗

١- كارب بسيط :
- بنقول عليه ايضا كارب مخفف (يعني تمت معالجته خارجيا وبشكل متكرر يعني تم تصنيعه) .
- كارب غير صحي .
- مؤشره الجلايسيمي عالي (( يعني برفع سكر الدم بنسبه كبيره جدا وسريعه ولذلك بيرفع هرمون الانسولين ايضا بصوره سريعه )) .
- مثل : السكر عموما (ابيض ، بني)، الحلويات ، العيش ، المعجنات ، المشروبات الغازيه ، وايضا عصير الفواكه (ليه هو غير صحي رغم انو من حاجات صحيه وطبيعيه السبب تحت) .

٢- كارب معقد :
- صحي .
- مؤشره الجلايسيمي منخفض (( يعني م برفع السكر ف الدم بصوره سريعه ولذلك هرمون الانسولين م بترفع بصوره سريعه ايضا )) .
- يحتوي علي كثير من الالياف المهمه جدا لصحه الجهاز الهضمي (( التي تساعد علي التحكم ف سكر الدم وانقاص الوزن { لانها تعطي احساس بالشبع لفترات طويله عن طريق انو عمليه الهضم تتم ببطء )) .
- مثل :
النشويات : البطاطس ، البطاطا الحلوة (البامبي) .
الحبوب الكامله : القمح ، الشوفان ، الارز البني ، الشعير .
الفواكه (( م ف شكل عصير )) .
الخضروات .

مهم :
- ليه الفواكه تتاكل م تتشرب ف شكل عصير : لانو في شكل عصير كده انت كسرت الالياف حقتها (الكارب فقد جزء من مكوناته وبقيت بتشرب في مويه + سكر) وبكده بتكون بقت كارب بسيط وح ترفع مستوي السكر ف الدم بصوره سريعه .
- ليه م قلنا الارز الابيض و المكرونه و الشعيريه : عشان ديل لمن يجو يصنعوهم بشيلو منهم الالياف (بيحصل ليهم عمليه تخفيف ونظافه) وبكده ح يبقو كارب بسيط وتزيد نسبه السكر ف الدم ((بس هم ارحم واحسن من العيش اكيييد)) .

اي اكل نحنا بناكله ممكن يتقسم لينا لثلاث عناصر :
١- بروتينات .
٢- كارب (كربوهيدرات او نشويات) .
٣- دهون .

# جوه الاكل ده ممكن نلقي حاجات تانية وال هي :
١- الالياف : موجوده اكتر شي في الخضروات والفواكه .
٢- الفاتمينات و المعادن : موجوده في الخضروات واللحوم والحبوب و بعض انواع البذور .

ولقدام ح نتناول موضوع الالياف و الفيتامينات و المعادن بصورة مفصلة اكتر باذن الله هم شنوو و فوائدهم شنو و مصادرهم .

🔹️البروتين : (( protein )) :
- هو عبارة عن مجموعه من الاحماض الامينيه .
- الاحماض الامينية دي زاتها هي شنو : دي المركبات ال بيتكون منها البروتين زاتو (ف جزء منها ممكن الجسم يصنعه وجزء منها الا نتحصل عليه من مصدر خارجي عن طريق الاكل) ، بتساعد برضو ف تقسيم مصدر البروتين الي :
١- كامل : يعني بحتوي علي كل الاحماض الامينية دي (مصدر كويس وممتاز) .
٢- غير كامل : بحتوي علي جزء من الاحماض الامينية (ما كلها يعني هنا ما بنقول انه مصدر كعب بس يعتبر مصدر ناقص) .

🚩اهميته (البروتين) :
- يدخل في تكوين العضلات وبناء الانسجه واصلاح التالف منها ويدخل ف تركيب معظم خلايا الجسم (( شعر ، جلد ، عظام ، عضلات ، غضاريف )) .
- ويدخل ايضا في تركيب هرمونات الجسم .
- يمد الجسم بالطاقه ايضا .
- الجسم ما بصنع البروتين او يخزنه لفتره طويله (( م بصنع كل الاحماض الامينيه كتعبير ادق ويخزنها )) عشان كده لازم يتحصل عليه من مصدر خارجي (( ناكل حاجات فيها بروتين )) .

🚩نجي لانواع ( مصادر ) البروتين :
أ- حيواني (كامل الاحماض الامينية) :
- افضل مصادر البروتين لان به جميع الاحماض الامينيه المهمه .
مثل : الجبنه ، اللحوم الحمراء(( ضان ، بقر ، ماعز ، ابل )) واعضاء الحيوانات ((كبدة ، قلوب ، كلاوي)) ، اللحوم البيضاء(( الدجاج ، الأسماك )) ، البيض .
ب- نباتي (غير كامل الاحماض الامينية) :
- مصادر بروتين قليله الفائده و الجودة بسبب نقصها في الاحماض الامينيه (( هنا م بتكلم عن انو الخضار كعبه لااااا لكن كمصدر بروتين اساسي ونعتمد عليه هو بس طول حياتنا ف هي سيئه جدااا ليه : لانو اول شي ما بناخد كل الاحماض الامينية منها لانو اصلا فيها نقص ف بكده ح تاثر علي جسمنا شديد لانو البروتين ما حا يكون كامل ف ح ياثر علي نمو انسجتنا وعضلاتنا ، النقطه التانيه : انو لو اعتمدنا عليها وبقينا ناخدها بكميات كبيره كده بندخل لجسمنا سموم كتيره لانو بعض انواع النباتات دي بتحتوي علي سموم)) .

مثل : البقوليات (العدس ، الفول) ، المكسرات ( اللوز) ، الفول السوداني (الدكوه) ، الحبوب الكامله (القمح ، الشوفان) ، الخضروات (البروكلي ، القرنبيط) .

- ف مثلا انت لو بتاكل ربع كيلو لحمه عشان تجيب نفس الفايده من البروتينات النباتيه ((وم ح تجيبها اصلا لانو ف عناصر كتيره ف اللحم مش موجوده ف النبات)) ف محتاج اقل شي نص كيلو من الخضروات لو افترضنا ولازم تكون من مصادر مشكله (يعني تشكل كم مصدر فول + عدس عشان تحاول تستفيد وتسد نقص الاحماض الامينيه) + شويه من الحبوب (شوفان) ف شوف الكميه ح تكون بقت قدر شنووو وم ح تقدر تاكلها اصلا كلها + الفايده برضو مش ح تكون زي اللحوم .

- ف النهاية هنا انا ما بقصد انو النباتات كعبه وانه نخليها لااا طبعا بالعكس هي كويسه ومفيده كمان عشان فيها (الياف ومعادن وفايتمينات وح نتكلم عنهم قدام) لكن المقصود انو ننوع بينها وبين المصادر الحيوانية عشان نقدر نتحصل علي كل الفوائد ، وما يكون تركيزنا عليها هي بس .