VETA

Matukio mbalimbali katika picha ni wakufunzi 25 wa VETA wakiambatana na Watumishi wa VETA Makao Makuu kutoka Kitengo cha Mafunzo, leo tarehe 10 Mei, 2026 wakiwa katika Uwanja wa Ndege wa Kimataifa wa Julius Nyerere, jijini Dar es salam,tayari kwa safari ya Kwenda nchi Finland kujifunza ujuzi wa teknolojia zinazohitajika katika uchimbaji na ukuzaji mnyororo wa thamani wa madini.

UFUNDI STADI WATAWALA MJADALA WA BAJETI WA WIZARA YA ELIMU, SAYANSI NA TEKNOLOJIA YA 2026/2027.

Suala la Elimu na Mafunzo ya Ufundi Stadi limepewa umuhimu na mtazamo wa kipekee wakati wa mjadala wa Bajeti ya Wizara ya Elimu, Sayansi na Teknolojia 2026/2027 katika Bunge la Jamhuri ya Muungano wa Tanzania uliohitimishwa leo, tarehe 8 Mei 2026.

Akizungumza kabla ya kuhitimishwa kwa mjadala wa bajeti ya Wizara hiyo, Naibu Waziri wa Elimu, Sayansi na Teknolojia, Mheshimiwa Wanu Hafidh Ameir hali hiyo imejidhihirisha kwa wabunge kutoa michango mingi na kuuliza maswali mengi zaidi kuhusiana na VETA, ambapo asilimia 62.96 ya maswali yaliyoulizwa yalihusiana na VETA.

“Kati ya maswali 27 yaliyoulizwa na waheshimiwa wabunge, 17 yalielekezwa VETA,” amesema.

Akifafanua kuhusu baadhi ya maeneo, Mheshimiwa Wanu Ameir amesema ujenzi wa awamu ya kwanza wa vyuo 65 vya VETA unatarajiwa kukamilika Septemba 2026 na kwamba fedha ya kumalizia ujenzi huo imeshapatikana.

Kuhusu rasilimali watu kwa ajili ya kuendesha mafunzo ya ufundi stadi, Mheshimiwa Wanu Ameir amesema mwaka huu Serikali imepata kibali cha kuajiri wakufunzi 770 wa vyuo vya ufundi stadi.

Vilevile, Mheshimiwa Wanu Ameir amebainisha kuwa Shilingi Bil 150.3 zimetengwa kupitia mradi wa ESPJ II kutumika katika nunuzi wa vifaa kwa ajili ya vyuo vya VETA.

Sambamba na hayo, amebainisha kuwa VETA imeingia makubaliano na viwanda takribani 87 kwa ajili ya kushirikiana katika utoaji mafunzo kwa vitendo kwa wanafunzi.

Bunge limepitisha Bajeti ya Wizara ya Elimu, Sayansi na Teknolojia yenye jumla ya Shilingi trilioni 2.3.