KFA

KFA
Stofnað 7. Íþróttafélagsamtök lyftinga- og kraftlyftingamanna á Akureyri og nágrenni. Kraftlyftingafélag Akureyrar var stofnað 7. janúar árið 1975.

janúar 1975
---
Kt: 631080-0309
Hjalteyri 604
---
Íþróttastarf, lyftingar, viðburðir og starfsemi tengd því - og allt annað 🐺
---
⏰ Þjónustutímar fyrir félagsmenn & dropinn
---
Virkir dagar 15:30 - 21:00
Helgar 11:00 - 17:00

19/09/2026

Á Hjalteyri er staðurinn sjálfur alltaf hluti af verkinu.

Undanfarin tíu ár hafa nemendur á fyrsta ári í meistaranámi við myndlistardeild Listaháskóla Íslands dvalið hér í eina viku sem hluta af vinnustofu haustannar. Þar vinna þau út frá sögu Verksmiðjunnar, rýminu og sérstöðu Hjalteyrar.

Hver hópur nálgast staðinn með sínum hætti. Verksmiðjan verður því ekki aðeins sýningarrými heldur líka efniviður og viðfangsefni í vinnu nemendanna.

Að þessu sinni dvelja níu nemendur LHÍ og tveir KUNO-nemendur á Hjalteyri dagana 13.–20. september. Vinnustofuna leiða Sigurður Guðjónsson, myndlistarmaður og prófessor við LHÍ, og Gústav Geir Bollason, myndlistarmaður og stofnandi Verksmiðjunnar.

Dvölinni lýkur með sýningunni Murmuration, sem opnar í Verksmiðjunni í dag, laugardaginn 19. september, kl. 16:00–18:00.

Þetta eru alltaf svo flottar sýningar hjá þessum krökkum. Það er gaman að sjá hvernig hver hópur les staðinn með nýjum augum og fá um leið innsýn í þá strauma og hugmyndir sem eru á ferðinni innan LHÍ hverju sinni.

Það væri sérstaklega ánægjulegt að sjá sem flesta koma í Verksmiðjuna og fagna þessum tíu ára áfanga með nemendum og aðstandendum sýningarinnar.

Alltaf allir velkomnir á Hjalteyjuna.

16/09/2026

Ég kynntist Quintin þegar ég þjálfaði Viktor Samúelsson. Þeir kepptu báðir í A-hópi á heimsmeistaramótunum í Plzeň 2017, Halmstad 2018 og Dubai 2019.

Strax sá ég að Quintin var vel þjálfaður og skipulagður íþróttamaður. En það var ekki aðeins styrkurinn sem vakti athygli. Hann var alltaf kurteis og kom vel fram við bæði andstæðinga og liðsfélaga — sannkölluð fyrirmynd, rétt eins og Viktor okkar.

Quintin byrjaði í kraftlyftingum 14 ára gamall eftir að hafa ekki fundið sig í hefðbundnum íþróttum. Á fyrsta mótinu pressaði hann 42,5 kg. Síðan eru liðin 21 ár og yfir 80 keppnir. Besti bekkurinn hans er 320 kg í keppni og 340 kg á æfingu.

Það eitt væri merkur ferill. En raunverulegt vægi Quintins liggur annars staðar.

Hann rekur eigin æfingastöð, heldur mót og byggir upp samfélag í kringum íþróttina. Eiginkona hans og dóttir keppa líka — lyftingar eru orðnar sameiginlegur hluti af lífi fjölskyldunnar.

Hann hefur farið allan hringinn.

Lyftingarnar tóku dreng sem fann sig ekki í almennum íþróttum og gáfu honum vettvang til að finna eigin styrk. Hann mótaði sjálfan sig með aga og áreynslu — og skapar nú sama vettvang fyrir aðra.

Ég sá Quintin síðast keppa í Dubai árið 2019. Nú kemur hann til Hjalteyrar sjö árum síðar sem afreksmaður, fjölskyldufaðir, mótshaldari og leiðtogi — fulltrúi þess besta sem lyftingar geta gert.

🏋️ Quintin keppir í fyrsta riðli kl. 10:00 á föstudeginum, í -125 kg flokki.

🎟️ Miðar fást á tix.is.

Koma svo, Quintin!

15/09/2026

Haraldur Ólafsson og gott fylgdarlið komu askvaðandi hingað til Hjalteyrar í dag.

Það var dýrmætt að skoða salinn með Halla og fara yfir uppsetninguna og smáatriðin sem geta skipt máli. Hann hefur sjaldgæfa sýn á verkefnið, enda þekkir hann bæði listina og mótahaldið.

Halli er heiðursfélagi bæði KFA og Lyftingasambands Íslands. Hann varð fyrstur Íslendinga þrefaldur Norðurlandameistari, var tvívegis kjörinn íþróttamaður Akureyrar og setti 106 skráð met á ferlinum. Hann hefur jafnframt mikla reynslu af mótahaldi og var mótsstjóri Norðurlandamótsins árið 1989.

Að loknum keppnisferlinum sneri Halli sér að öðru listformi og hefur um árabil verið í fremstu röð íslenskra uppstoppara. Hann varð Evrópumeistari í uppstoppun fiska árið 2018.

Eitt eftirminnilegasta verk hans er þessi risalúða. Það tók þrjá mánuði að þurrka hana við gerð verksins.

Það hefði verið stórkostlegt að fá lúðuna til sýnis á Hjalteyri yfir heimsmeistaramótið. Halli bauðst þess í stað til að lána okkur annan grip yfir mótshelgina: ref sem hann vann nýlega fyrir uppstoppunarkeppni. Að hans sögn er þetta einn stærsti íslenski refur sem hann veit til.

Íslenski refurinn er eina landspendýrið sem var hér fyrir landnám og verður áhugaverður hluti af íslenskri umgjörð mótsins.

Það er alltaf fengur að fá Halla í heimsókn og heyra hreinskilna sýn hans á verkefnin. Slík reynsla kemur sér vel nú þegar við undirbúum heimsmeistaramót Alþjóðlega lyfjalausa kraftlyftingasambandsins (IDFPA) í bekkpressu hér á Hjalteyri.

13/09/2026

Lyftingaskóli á Hjalteyri í dag

👧🧒 Yngri hópur (3–5 ára): kl. 11:00–12:15.
👦👧 Eldri hópur (6–9 ára): kl. 12:30–14:00.

🏋️ Opið gym frá kl. 11:00–17:00, með þrautabraut, klifurþrautum og fjölskylduvænni stemningu. Við leikum okkur, prófum og lærum saman.

Aðgangur: 1.000 kr. á barn. Frítt fyrir foreldra.
Engin skráning — það má bara mæta!

Hulda ætlar að setja upp þrautabrautina í dag. Grelli verða þarna á vappi.

09/09/2026

Grelli rakst á goðsögnina Ólöfu Eir Guðmundsdóttur fyrir utan verksmiðjuna á Hjalteyri í gærkvöldi. Hún var nýkomin úr sjósundi á Hauganesi og farin að prófa kúlusteinana okkar.

Það er dæmigert fyrir Ólöfu. Hún mætir sjaldan á hefðbundnar æfingar.

Hún kom með okkur inn í salinn, heilsaði upp á fólkið og skoðaði áhöldin. Mestan áhuga hafði hún auðvitað á því sem leit út fyrir að vera þungt. Að lokum var hún farin að leika sér með 80 kílóa ketilbjölluna — með annarri hendi.

Hún segist hafa lært að vera sterk í sveit á Snæfellsnesi. Hér fyrir norðan hefur hún unnið sér til metorða í sláturhúsum, við bústörf og ýmiss konar erfiðisvinnu.

Ólöf er vel þekkt á svæðinu, sérstaklega meðal fólks úr lyftingaheiminum og víðar þar sem raunverulegur styrkur er metinn að verðleikum. Hún á sér enda sérstakan sess í íslenskri lyftingasögu: Ólöf var fyrsta íslenska konan til að taka 100 kíló á kjötinu í guðsgreininni — og það fyrir aldamót.

Á Akureyri þekkja hana flestir úr miðbænum um helgar. Þar gengur hún um á næturnar, safnar flöskum og spjallar við fólk. Þetta er hennar leið til að taka þátt í bæjarlífinu og í gegnum árin hefur hún sjálf orðið órjúfanlegur hluti af ásýnd miðbæjarins.

Hún var kvíðin við að æfa innan um annað fólk og kom sér því upp bekkpressubekk í kjallaranum heima. Í gegnum árin hefur hún þó reglulega laumast til okkar og tekið leynitoppa þegar fáir eru á staðnum.

Kvöldið endaði svo, inni á Leynibarnum yfir svalandi ananasdrykk.

08/09/2026

Byrjendanámskeið í styrktarþjálfun fyrir 35 ára og eldri

Vegna mikillar eftirspurnar bjóðum við upp á sérstakt byrjendanámskeið í styrktarþjálfun á Hjalteyri í haust.

Námskeiðið er sérhannað fyrir fólk sem vill fá faglega kennslu frá grunni. Það hentar bæði algjörum byrjendum og þeim sem vilja hefja æfingar á ný eftir langt hlé.

Farið verður yfir:

- upphitun og virkjun
- tæknilega framkvæmd æfinga og helstu hreyfinga
- meiðslavarnir, mótvægisæfingar og teygjur
- skipulag og stigvaxandi uppbyggingu æfinga
- aðferðir til að ná stöðugum og markvissum framförum í styrk og vöðvauppbyggingu

Markmiðið er að þátttakendur ljúki námskeiðinu með þekkingu, verkvit og sjálfstraust til að stunda styrktarþjálfun á eigin forsendum og byggja upp, viðhalda eða endurheimta styrk til framtíðar.

Innifalið er aðgangur að aðstöðu félagsins utan námskeiðstíma. Á föstudögum verður einnig boðið upp á valkvæða æfingatíma með leiðbeiningum og eftirfylgni.

Umsjónarmenn námskeiðsins eru Hulda og Grelli, þjálfarar hjá KFA.

Staðsetning: Lyftingaskólinn á Hjalteyri
Lengd: Sjö vikur
Upphaf: Mánudagurinn 19. október
Verð: 49.900 kr.

Konur: mánudaga og miðvikudaga kl. 17:00
Karlar: mánudaga og miðvikudaga kl. 19:30

Aðeins níu sæti eru í hvorum hópi svo hægt sé að veita hverjum þátttakanda persónulega leiðsögn.

Skráning og nánari upplýsingar:
[email protected]

06/09/2026

Það er alltaf lyftingaskóli á sunnudögum í verksmiðjunni á Hjalteyri, allan ársins hring.
Opið 11 til 17 og öll velkomin 🙌🏻
Áhersla: Þrautabraut og klifur

01/09/2026

Eftir 45 daga hefst heimsmeistaramótið í lyfjaprófaðri bekkpressu hér á Hjalteyri.

Mótið fer fram 16.–17. október á vegum IDFPA. Undirbúningur hefur staðið yfir síðan í febrúar og nú tekur við lokaspretturinn, þar sem síðustu þættir skipulagsins og framkvæmdarinnar verða pússaðir saman.

Vel á annað hundrað þátttakendur koma að mótinu þessa helgi. Saman verður þetta fjölbreytt, alþjóðlegt samfélag sem hittist hér á jaðri veraldar til að keppa um heimsmeistaratitla og kynnast þeirri menningu og þeim anda sem hefur vakað yfir kraftafólki fyrir norðan í hálfa öld.

Okkur þykir sérlega skemmtilegt að halda heimsmeistaramót í bekkpressu hér fyrir norðan. Í okkar röðum hefur bekkpressan nefnilega verið kölluð Guðsgreinin allt frá árinu 1979, samkvæmt kenningu Kára Elíssonar.

Bekkurinn er altarið og stönginni er pressað upp í átt að almættinu.

Bekkpressan hefur lengi verið eins konar manndómsvígsla í lyftingamenningunni — prófraun þar sem konur jafnt sem karlar takast á við þyngdina, byggja upp trú á eigin getu og leita síðan hærra. Menn ná ólíkum stigum, en glíman er alltaf sú sama.

Þetta er líklega það sígilda form lyftinga sem flestir hugsa fyrst um þegar þeir komast í kynni við kalt stálið. Það er mælikvarði sem lifir langt út fyrir keppnissalinn og spurningin sem allir lyftingamenn þurfa fyrr eða síðar að svara:

Hvað tekurðu í bekk?

Undanfarin misseri höfum við haldið fjölbreytt mót og viðburði, þróað aðstöðuna og safnað þeirri reynslu sem þarf til að takast á við verkefni af þessari stærðargráðu. Nú ætlum við að tengja alla þræðina saman og skapa eftirminnilega helgi fyrir keppendur, starfsfólk, gesti og heimamenn.

Á næstu vikum kynnum við keppendur og fólkið sem kemur að mótinu. Við munum einnig segja frá sögu lyfjaprófaðra kraftlyftinga og hugsjónunum sem liggja að baki þessum vettvangi.

Það verður gaman að sjá hversu margir öðlast tilveruréttinn á Hjalteyri.

Miðasalan er komin í loftið og hægt er að kaupa miða á tix.is.

30/08/2026

Lyftingaskólinn á Hjalteyri er opinn í dag frá kl. 11:00–17:00.

Hulda hefur sett upp þrautabraut og tekur spennt á móti gestum í Síldarkastalanum. Allir krakkar eru velkomnir til að spreyta sig á þrautabrautinni, leysa klifurþrautir og leika sér.

Í dag er jafnframt síðasti dagurinn á sýningunni SÝNI í Verksmiðjunni.

Við mælum eindregið með því að kíkja við á Hjalteyri í dag.

23/08/2026

Sunnudagur á Hjalteyri

🧒👧 11:00–16:00 – Lyftingaskóli
Leikur, jafnvægi og hreyfifærni með foreldrum

🔓 11:00–17:00 – Open Gym
Þrautabrautir, drop-in og fjölskylduvænt andrúmsloft.

Aðgangur 1000kr fyrir barn, frítt fyrir foreldra.

Address

Hjalteyri

Website

https://www.lyftingaskolinn.is/

Alerts

Be the first to know and let us send you an email when KFA posts news and promotions. Your email address will not be used for any other purpose, and you can unsubscribe at any time.

Want your business to be the top-listed Gym/sports Facility in Hjalteyri?

KFA