Добредојдовте во ЕК Нов Ветер!
Зошто едрење?
Едрењето е одличен спорт, независно дали едрите од хоби или се натпреварувте. Незаменливо е чувството кое го имате кога сте на вода, кога ветерот ги полни едрата и кога сами или заедно со својот тим се трудите да ги искористите стекнатите теориски и практични знаења за да го извлечете максимумот од силата на природата.
Има многу причини зошто едрењето е една од најдобрите работи кои можете да ги правите во вашето слободно време. Голем број едриличари ќе ви кажат дека едрењето ви дозволува да избегате од се’, ве учи на многу технички вештини, ви го зголемува чувството на слобода, на брзина, ви помага да се почувствувате поврзани со природата.
Други ќе ви кажат дека едрењето ви дозволува да пронајдете мир и тишина, дека ви го успорува времето и ви помага да се самоспознаете.
Едрењето го наградува фокусот, напорот и натпреварувачкиот дух и најбитно од се ве учи да бидете дел од тим. Едрењето бара внимание, посветеност, создава предизвици и помага да ги спознаете своите сили.
ЕК Нов Ветер
ЕК Нов Ветер е формиран во јуни 2017 година во Скопје на иницијатива на едриличари и скипери кои во изминатите десетина години активно едреа и другаруваа на Јадран, самостојно или како членови на други едриличарски клубови.
Мисијата на клубот е преку своите активности да придонесе за промоција и зголемување на интересот за едрењето, но пред се за поморското едрење и навигацијата, да ги поттикне младите генерации да се запознаат со едрењето и да го прифатат и практикуваат истото како спорт или хоби.
Нашата визија е да создадеме клуб кој ќе биде отворен и во кој ќе биде добредојден секој вљубеник во едрењето. Клубот засега брои околу 100 членови, прекрасни и интересни луѓе од најразлични професии и старосни групи. Ќе се стремиме да прераснеме во водечки едреличарски клуб во Македонија и тоа преку:
- Примање на нови едриличари;
- Опфаќање на луѓе од различни средини;
- Посветеност кон обезбедување на учество, обука и можности за натпреварувачко едрење.
ЕК Нов Ветер организира едрење, регати и флотили на Јадран, Егеј, Јонско море и пошироко. Главен настан на клубот е регатата „Меморијал Славе Герасимовски“, со натпреварувачки карактер која се одржува во октомври и мајското едрење кое има послободна форма во зависност од интересот на учесниците, а се организира во последната недела на Мај. Клубот активно функционира од Септември до Јуни.
Покрај овие два настана, клубот одржува редовни месечни средби на своите членови, секој последен четврток во месецот. Локацијата на средбите се менува и се објавува недела дена пред средбата на FB страницата на клубот. Овие средби се најдобар начин за сите заинтересирани идни членови да дојдат и одблиску да се запознаат со активностите и начинот на функционирање на клубот.
Активностите на клубот ќе бидат насочени кон развивање на следниве четри главни подрачја: безбедност, едрење за заедницата, натпревар, капацитети.
- Одржувањето на безбедноста како највисок приоритет за сите активности при едрењето;
- Промовирање на едрењето во пошироката заедница преку обезбедување на постојани, добредојдени и опфатни можности за едрење.
- Развивање на програма за тренирање и натпреварување на едриличари;
- Организирање на разни интерни клубски натпревари;
- Сериозна посветеност во заложбите за воспоставување и работа на трајни, сеопфатни капацитети за спортови на вода во Македонија;
Членовите на клубот во текот на годината учествуваат и на други домашни и меѓународни едрења и регати.
Клубот во текот на годината организира обуки за заинтересирани членови за основите на едрењето, регатните правила и навигацијата.
Клубот организира и учествува и во други социјални настани од хуманитарен и друг карактер.
