11/09/2026
សំណេរឯកឧត្តម"ខូវ ឆាយ"ពីទីក្រុងតូក្យូប្រទេសជប៉ុន🇰🇭🤝🎌!
ព្រឹត្តិការណ៍ប្រវត្តិសាស្ត្រថ្មីមួយសម្រាប់វិស័យគុនខ្មែរ!
ខ្ញុំមានកិត្តិយសបានចូលរួមក្នុងពិធីចុះហត្ថលេខាលើអនុស្សរណៈនៃការយោគយល់គ្នា រវាងសហព័ន្ធកីឡាប្រដាល់គុនខ្មែរកម្ពុជា និងស្ថាប័ន K-1 Japan នៅទីស្នាក់ការកណ្ដាល K-1 នាទីក្រុងតូក្យូ ប្រទេសជប៉ុន។
កិច្ចសហប្រតិបត្តិការនេះមានគោលបំណង៖
១. បង្កើតឱកាសឱ្យកីឡាករគុនខ្មែរចូលរួមប្រកួតក្នុងកម្មវិធី K-1 នៅប្រទេសជប៉ុន និងបណ្ដាប្រទេសនានា។
២. ជំរុញឱ្យមានការប្រកួតតាមច្បាប់គុនខ្មែរ ក្នុងព្រឹត្តិការណ៍របស់ K-1។
៣. ផ្លាស់ប្ដូរបទពិសោធន៍ និងបង្កើនកិច្ចសហការលើការបណ្ដុះបណ្ដាលកីឡាករ គ្រូបង្វឹក និងមន្ត្រីបច្ចេកទេស។
៤. ចូលរួមផ្សព្វផ្សាយគុនខ្មែរ សិល្បៈ វប្បធម៌ អរិយធម៌ខែ្មរ និងសក្តានុពលទេសចរណ៍កម្ពុជា ទៅកាន់ពិភពលោក។
៥. សហការបង្កើតព្រឹត្តិការណ៍ K-1 នៅក្នុងប្រទេសកម្ពុជាចំនួន ១០ កម្មវិធី ចាប់ផ្តើមពីចុងឆ្នាំ ២០២៦ ដល់ចុងឆ្នាំ ២០២៧។
អនុស្សរណៈនេះជាជំហានដ៏សំខាន់ក្នុងការពង្រីកទីផ្សារ និងលើកកម្ពស់កិត្យានុភាពគុនខ្មែរឱ្យកាន់តែមានវត្តមានទូលំទូលាយលើឆាកអន្តរជាតិ ព្រមទាំងបង្កើតឱកាសថ្មីៗសម្រាប់កីឡាករគុនខ្មែរបង្ហាញសមត្ថភាពនៅលើសង្វៀនលំដាប់ពិភពលោក។
សូមថ្លែងអំណរគុណដល់ថ្នាក់ដឹកនាំស្ថាប័ន K-1 Japan និងភាគីពាក់ព័ន្ធទាំងអស់ ដែលបានចូលរួមជំរុញឱ្យកិច្ចសហប្រតិបត្តិការដ៏មានសារៈសំខាន់នេះក្លាយជាការពិត។
រួមគ្នាអភិវឌ្ឍ និងនាំគុនខ្មែរឆ្ពោះទៅកាន់ឆាកពិភពលោក!