FASK Kosova

Valdet Kaçandolli me pikë të reja, pas shtatë garave, i dyti në Grupin 3

Valdet Kaqandolli e ka përballuar me sukses edhe një sfidë në aventurën e tij jetësore, Kampionatin Evropian në Hill Climb.

Në garën e 7-të, në Limanova të Polonisë, Kaçandolli me Suyzuki Swift u rendit i treti në Grupin 3, duke i inkasuar edhe 15 pikë të reja, shumë të rëndësishme për plasmanin përfunditar.

“Ishte garë shumë sfiduese, sidomos duke marrë parasysh kushtet atmosferike. Jam i kënaqur që sërish isha në podium dhe tani duhet të mendojmë për garat e radhës”, ka thënë Kaçandolli pas garës në Poloni.

Në vozitjen e parë, ai në cak arriti për 02:25.574 minuta, ndërsa në të dytën për 02:31.704, koha e përgjithshme 04:57.278 minuta.

Pas shtatë garave të mbajtura, në Grupin 3, ku deri tani janë paraqitur 17 garues, Valdeti renditet i dyti me 89 pikë.
para tij është vetëm garuesi çek Marek Rybniçek me 133 pikë.

Deri në fund të kampionatit të sivjetmë kanë mbetur edhe tri gara, në Zvicër, Slloveni dhe Kroaci.

Blerand Hasanaj rikthehet fuqishëm dhe me një dedikim të veçantë

Blerand Hasanaj pas një kohe të gjatë është kthyer në shkallën më të lartë të podiumit të fituesve në një garë të disiplinës malore. Dhe kjo ndodhi të dielën në Brezovicë, në një garë e shteg me shumë të veçanta.

Blerandi doli i pari në Klasën PF3, por edhe i pari në plasmanin e përgjithshëm të FIA CEZ dhe Kampionatit të Kosovës, në kategorinë e veturave.

“Kam pasur shumë probleme me veturën, por pasioni i madh për këtë sport nuk më lejon të dorëzohem. Brezovica ishte shtegu dhe gara e duhur për një rikthim të fuqishëm dhe jam shumë i kënaqur për këtë fitore”, është shprehur Hasanaj, i cili njihet si garuesi që “ia nxjerr shpirtin” veturës së tij.

Fitoren e së dielës, ai ia dedikon një njeriu të veçantë, prindit të tij.

"Këtë fitore ia dedikoj Babait, tim i cili ka ndërruar jetë para katër muajve dhe kjo është fitorja e parë pas humbjes së prindit”, është shprehur Blerandi i emocionuar.

Ai i ka falënderuar sponsorët: Besa Security, Marimanga, AMK Automotive dhe GreenSteam si dhe shokët e tij për mbështetjen që i kanë dhënë.

Gentian Shaqiri fiton me rekord në Brezovicë

“Brezovica 2026” ishte garë e rëndësisë së shumëfishtë, ndërsa sivjet ishte edhe Memorial kushtuar ikonës së auto sportit kosovar, Menduh Daka, i cili ndërroi jetë në vitin e kaluar.

Në fillim të ceremonisë së shpalljes së fituesve ishte një moment mjaft emocional.

Faton Hyseni në emër të AK Ferizajt dhe kryetari i FASK-ut, Agron Dida, ndanë mirënjohje për familjen e të ndjerit Daka.

Duke marrë parasysh se gara ishte e vlefshme për FIA CEZ dhe Kampionatin e Kosovës, pastaj faktin që sivjet fituesit janë ndarë për makinat njëvendëshe dhe kategorinë e veturave, patëm disa fitues.

Gjithsesi, fituesi kryesor ishte garuesi nga Shqipëria, Gentian Shaqiri.

Ai me Tatuus, shtegun prej 7.7 kilometrave e kaloi për vetëm 03:47.470 minuta, duke vendosur rekord të ri të shtegut.

“Jam shumë i kënaqur me garën e sotme. Ishte organizim shumë i mirë për çka e përgëzoj organizatorin, me theks të veçantë Sedatin (Ryshën) për punën e madhe që ka bërë, sidomos për asfaltimin e pjesë së rrugës që kishte shumë nevojë. Jam i kënaqur edhe me faktin që vendosa rekord të shtegut. Edhe makina sot ishte në gjendje shumë të mirë. Me një fjalë, ishte një ditë shumë e mirë”, ka thënë Shaqiri pas fiores.

Në pozitën e dytë në plasmanin e përgjithshëm të FIA CEZ u rendit Bardhyl Canolli i Eurogoma RT me Radicall SR8, me kohë 03:57.749 minuta, ndërsa podiumi u plotësua me Blerand Hasanajn e Prizenit D&G, i cili me Audi S3 në cak arriti për 04:15.512 minuta.

Bardhyl Canolli ishte i pari në plasmanin e përgjithshëm për makinat njëvendëshe për kampionatin vendor, ndërsa tre të parët në kategorinë e veturave ishin: Blerand Hasanaj e Egzon Ukëhaxhaj të Prizrenit D&G dhe Gazmend Demolli i Prishtina Racing Team.

Në plasmanin ekipor, në pozitën e parë u rendit Prizreni D&G me 90 pikë, para AK Ferizajt me 82.5 e Klubi Auto Kosova – Ferizaj me 45 pikë.

Klubi organizator, për klubin më të suksesshëm i ndau 300 euro, për të dytin 200 dhe për të tretin 100 euro.

Kur jemi te këto shpërblime, kryetari i AK Ferizajt, Sedat Rysha, bëri edhe një veprim human, pasi shumën që i takoi klubit të tij (200 euro) ia dhuroi garuesit Xhengiz Hajrullahu, i cili e dëmtoi veturën gjatë garës.

Rezultatet komplete mund t’i shihni në linkun e mëposhtëm:
https://kstiming.com/

Gjithçka gati për Memorialin “Menduh Daka”

Fundjava për garuesit dhe dashamirët e disiplinës malore do të jetë e veçantë. Në radhë është gara në Brezovicë, e cila është e rëndësisë dhe e karakterit të veçantë.

“Brezovica 2026” është e vlefshme për Kampionatin e Kosovës dhe Kampionatin e FIA CEZ, ndërsa sivjet do të jetë edhe Memorial për nder të ikonës së auto sportit kosovar, Menduh Daka, i cili ndërrroi jetë në vitin e kaluar.

Federata e Auto Sportit e Kosovës dhe AK Ferizaj, kanë vendosur që në këtë mënyrë të nderohet ish-garuesi, themeluesi, ish-kryetari e nënkryetari i FASK-ut, ndërsa me shumë gjasë kjo do të jetë tradicionale.

Zyrtarët e garës Brezovica Hill Climb 2026

Edhe Gazmend Demolli me Opel Astra

Gazmend Demolli është garuesi që “ka bërë ligjin” në kohët e fundit në disiplinën malore në Kampionatin e Kosovës.

Pas sukseseve të shumta me Radicall SR8 e më pas me Mitsubishi EVO 9, Demolli këtë fundjavë do të paraqitet më ndryshe.

Anëtari i Prishtina Racing Team, në Brezovicë do të garojë me një Opel Astra OPC me 400 ps.

“Në Brezovicë, por edhe në garat tjera të këtij viti do të garoj me Opel Astra. Shpresoj të arrij rezultat të mirë, megjithëse është vetëm gara e parë me këtë veturë”, ka thënë Demolli.

Megjithatë, duket se kjo është një zgjidhje e përkohshme. “Për vitin e ardhshëm po planifikoj të paraqitem me një veturë tjetër, me të cilën synoj rezultate të mira dhe në garat evropiane”, ka shtuar Gazi.

Në Brezovicë, risi do të jetë edhe Opel Astra e Valon Rexhepit.

Gara e madhe, “Brezovica 2026”, e vlefshme për Kampionatin e Kosovës dhe FIA CEZ po afrohet.

Organizatori, AK Ferizaj në bashkëpunim me FASK-un dhe institucionet tjera ka punuar pothuaj tash e një muaj në përgatitjen sa më të mirë të shtegut.

Përgatitjet tashmë janë në fazën përfundimtare, prandaj është e qartë se fundjava në Brezovicë do të jetë festë automobilistike.

Linku për aplikim:

KS Timing

Valon Rexhepi, në Brezovicë me një Opel Astra tjetër

Valon Rexhepi hyn në mesin e garuesve që nuk heziton të shtypë pedalen e gazit dhe të rrezikojë deri në limite, me synimin për të arritur rezultate sa më të mira.

Këtë trajtim do ta ketë edhe vetura e tij e radhës, Opel Astra, me të cilën Valoni do të paraqitet në këtë fundjavë në garën në Brezovicë.

“Nga kjo garë do të jem me veturë tjetër. Bëhet fjalë për Opel Astra OPC 2.0 turbo. Vetura i ka mbi 400 hp dhe ndërrues të shpejtësive bacci sekuencial”, ka treguar Rexhepi.

Gjithsesi, ai shprehet shumë i matur para garës së fundjavës. “Është vetëm gara e parë me këtë veturë. Pra, në Brezovicë do të jetë një lloj testi më serioz. Kjo nuk do të thotë që unë nuk do të përpiqem të kem rezultat të mirë, por sigurisht do të jem shumë i kujdeshëm”, ka theksuar anëtari i Eurogoma Racing Team.

Ai planfikon që veç garave vendore të sfidojë veten edhe në rrafshin ndërkombëtar.

“Besoj që do të marr pjesë në Buzet. Dihet që është garë shumë atraktive, me konkurrencë të fortë dhe numër të madh të pjesëmarrësve, prandaj dëshiroj të sfidoj veten në një garë të tillë”.

Në fund, Valoni falënderon Exfis-in, Eurogomën dhe Bardhyl Canollin për mbështetjen që i kanë ofruar.

Rregullore e veçantë për garën në disiplinën malore, "Brezovica 2026", e cila mbahet më 18 e 19 korrik