12/10/2026
🚨 Trajneri Liridon Leci mohon se e ka sulmuar ish-futbollisten Edonisa Aliu, pas emisionit “Dueli Sportiv”
Trajneri Liridon Leci ka reaguar pas incidentit të raportuar pas përfundimit të emisionit sportiv “Dueli Sportiv”, duke mohuar se e ka sulmuar fizikisht ish-futbollisten Edonisa Aliu.
Përmes një reagimi publik, Leci ka deklaruar se bashkëpunimin me Televizionin Dukagjini e ka ndërprerë vetë, mbrëmjen e së dielës, drejtpërdrejt në emision, duke mohuar pretendimin se televizioni ia ka ndërprerë kontratën.
“Dua të theksoj se nuk kam sulmuar askënd dhe as nuk kam pasur për qëllim të fyej apo të denigroj ndonjë person, e aq më pak ndonjë femër”, ka shkruar Leci.
Ai ka kërkuar që fjalët e tij të mos shtrembërohen dhe të mos përhapen informacione që i konsideron të pavërteta.
“Besoj se faktet duhet të flasin vetë dhe se secili duhet të mbajë përgjegjësi për atë që thotë dhe për mënyrën se si i interpreton fjalët e të tjerëve”, ka theksuar ai.
Ndërkohë, TV Dukagjini kishte njoftuar më herët se kishte vendosur ta ndërpriste bashkëpunimin me Lecin pas incidentit të ndodhur më 11 tetor, duke bërë të ditur se me rastin po merren organet e rendit dhe të drejtësisë.
