Doha Elshawadfy Relationships coach

**"ونسيت إني امرأة."**

مش مجاز.
مش كلام.

ده اللي قالته لي بعيون دامعة بعد عشرين سنة من عمرها.

عشرين سنة وهي بتجري.
ورا أولاد. ورا بيت. ورا جوز موجود بجسمه وغايب بروحه.

صحيت يوم لقت التجاعيد بدأت تظهر على وشها.
ومش لاقية حد يسمعها.
لا جوزها. ولا أسرتها.

مهدئات. منومات. انغلاق على نفسها.

والكل اتعود إنها بتعطي...
ومحدش سأل: *وإنتي؟*

أنا عارفة الإحساس ده.

مش كـ كوتش.
كـ ست.

لما أولادي دخلوا المراهقة وانسحبوا من أيامي،
حسيت بفراغ رهيب ما كنتش عارفة أملاه.

قلة نوم. سمنة. إدمان الشراء هرباً من حاجة مش عارفة تسميها.

لحد ما سمعت الصوت اللي كان بيهمسلي من زمان...
*"في حاجة غلط."*

لا يمكن ربنا يكون خلقك وهيحاسبك في الآخرة علشان الأيام إللي بتتكرر شبهه بعضها دي وأنا بجري في ماراثون ،بس مش عشاني،عشان إللي حواليا كلهم،ومش مهم أنا

الفرق بيني وبينها؟

إني سمعت الصوت ده قبل ما أنسى نفسي خالص.

وهي جت لما التعب وصل للعضم.

العلاقة الزوجية مش بس عن الجوز والست.

**هي عن ست لسه بتتذكر إنها موجودة.**

لو في جزء منك بيقولك *"أنا كمان"...*

أنا هنا. 🤍

**إيه اللي نسيتيه في نفسك من زمان؟**


#كوتش #لم #الشمل

**"قعدة صفا... بتغير حاجة كبيرة"**

قبل ما تكملوا...

لو إنتوا زوجين حاسين إن في حاجة تقيلة بينكم.
مش خيانة. مش كراهية.
بس... إحساس إن محدش شايف محدش.

الكلام ده ليكم. 🤍

# # # الاتفاق الأساسي قبل ما تبدأوا

قبل أي كلام...
لازم تتفقوا على ٤ حاجات بس:

**١- وقت مناسب للاتنين.**
مش وأنت تعبان. مش وأنتِ زهقانة.
وقت إنتوا فيه حاضرين فعلاً.

**٢- مكان هادي.**
بعيد عن الأولاد والتليفونات والضوضاء.

**٣- واحد بيتكلم والتاني بيسمع بس.**
مش مسموح تقاطع. مش مسموح تدافع.
دورك جاي.

**٤- الهدف مش المكسب.**
الهدف إن كل واحد يحس إن التاني شايفه.

اتفقتوا؟

يلا نشوف حسين ودلال عملوا إيه...

# # # الساعة ١١بالليل

الأولادناموا.
البيت هدي.

دلال جابت كوبايتن شاي.
وقالت لحسين:

*"عايزة أتكلم معاك في حاجة...*
*بس محتاجة تسمعني بس."*

حسين حط التليفون.
بص في عينيها
وقال: *"اتكلمي."*

# # # الخطوة الأولى — اتكلم بـ "أنا"

مش "إنت بتعمل كذا."
مش "إنت مش بتاخد بالك."

بس:

**"أنا بحس بـ .......... لما بيحصل ..........."**

قالت دلال:

*"أنا بحس بوحدة...*
*لما بترجع البيت وتمسك تليفونك على طول.*
*بحس إني موجودة في البيت...*
*بس مش موجودة في حياتك."*

سكتت.

حسين حس إن جوّاه حاجة عايزة تقول:
*"بس أنا تعبان... وأنا برضو محتاج."*

بس فضل ساكت.

لأنه فاكر الاتفاق.

**دوره يسمع... مش يدافع.**

# # # الخطوة التانية — اعكس اللي سمعته

مش بترد.
مش بتقول "بس أنا..."

بتقول بس:

**"يعني إنت بتقولي إنك بتحسي بـ .......... لما بيحصل ..........."**
**"فاهم صح؟"**

قال حسين بهدوء:

*"يعني إنتِ بتقوليلي...*
*إنك بتحسي بوحدة لما بارجع وأفضل ماسك التليفون *
*وبتحسي إنك موجودة في البيت...*
*بس مش موجودة في حياتي."*

*"فاهم صح؟"*

بصت ليه دلال.

عيونها دمعت.

وقالت: *"أيوه... بالظبط."*

مش لأنه حل المشكلة.

لأنه لأول مرة من زمان...

**سمعها.**

# # # الخطوة التالتة — قول جملة واحدة بس

**"كلامك منطقي."**

مش معناها إنك غلطان.
معناها إنك شايف...
إن من زاويته... هو معاه حق.

قال حسين:

*"كلامك منطقي يا دلال.*
*لو أنا في مكانك...*
*كنت هحس بنفس الإحساس."*

سكتوا لثواني.

وبعدين قال حسين بصوت هادي:

*"أنا عايزك تعرفي إني تعبان برضو.*
*بس مش عارف أقول.*
*يمكن إحنا الاتنين محتاجين نتكلم أكتر."*

دلال مدتله إيدها.

وقالت: *"يلا نتكلم."*

مش كل مشكلة بتتحل في قعدة واحدة.

بس كل علاقة بتتغير...
لما طرف واحد يقرر يسمع من غير ما يدافع.

**الـ Dialogue مش أسلوب علاج.**
**هو عادة يومية بتقول لشريكك:**
**"أنا شايفك... وكلامك يهمني."** 🤍

جرّبوا قعدة الصفا الليلة.

واحد بيتكلم.
والتاني بيسمع.

وبعدين بتبدلوا الأدوار إللي ما اتكلمش يتكلم والتاني يسمعه لحد ما يخلص كل الكلام اللي جواه بدون مقاطعة ولا هجوم ولا حتي دفاع عن النفس...فضفضة بنيه التودد ومعرفة عالم الآخر بصدق

سؤال واحد بس تبدأوا بيه:

**"إيه اللي أنت محتاجه مني دلوقتي... وأنا مش واخد بالي منه؟"** 🤍

#كوتش #لم #الشمل

صباح النور 🌷

تعالي نبص لنفس الأسئلة… بس من زاوية تانية خالص 👇

إيه مفهوم الأنوثة داخل منظومة الزواج؟؟
هل الأنوثة شكل وجمال بس؟ ولا طاقة احتواء، أمان، ودفء يخلق بيت يعيش فيه الراجل مرتاح؟

ما نية الست من الزواج؟؟
هل هدفها الاحتواء؟ الشراكة؟ الاستقرار؟ ولا تعويض فراغات قديمة؟الهروب من بيت الأهل ،تجربة جديدة غير محسوبة النتائج ؟؟

ماهي طاقة وقدرة الست على العطاء داخل منظومة الزواج؟؟
هل عطاء بلا حدود؟ ولا عطاء واعي فيه توازن بين نفسها وبين بيتها؟

ماذا تريد المرأة من الزواج؟؟
حب؟ أمان؟ تقدير؟ اهتمام؟ شريك يشوفها ويسمعها بجد؟

وماذا تفعل لتحصل على ما تريد وتحافظ عليه طول رحلة الزواج؟؟
هل بتطلب بوضوح؟ ولا بتسكت وتستنى يفهم لوحده؟
هل بتقدّر؟ ولا بتركّز بس على اللي ناقص؟

أين يذهب الشغف بعد الزواج؟؟
هل بيختفي؟ ولا بيتحوّل… وإحنا اللي محتاجين نغذّيه؟

هل يدوم الحب من تلقاء نفسه؟؟
ولا محتاج وعي، مجهود، وتجديد مستمر؟

كيف ترى المرأة زوجها بعد فترة من الوقت؟
بعد الضغوط، المسؤوليات، الروتين…
هل لسه شايفاه “سند”,حبيب ،صديق،
ولا بقى مجرد “شريك في المهام”؟

كيف ترى نفسها بعد التغيرات؟
بعد الإنجاب، تغير الجسم، الإرهاق، أو حتى
اكتئاب ما بعد الولادة
هل لسه شايفة نفسها جميلة وكفاية؟
ولا بدأت تفقد صورتها عن نفسها؟

ما دورها في تلك الفترات؟
هل بتطلب الدعم؟
ولا بتستنزف نفسها لحد الانهيار؟

كيف تدعم زوجها؟
هل بتشوف مجهوده؟
هل بتشجّعه؟
ولا بتتعامل إن ده “طبيعي ومفروض”؟

كيف تشعر تجاه المولود الجديد؟
حب جارف؟ إرهاق؟ ضغط؟
هل قادرة توازن بين دورها كأم وزوجة…
ولا واحدة فيهم بتاكل التانية؟

هل تفكر المرأة فعلاً… لماذا تُنجب؟؟

هل اختيار واعي؟

ولا استجابة لضغط المجتمع وكلام الناس؟
ولا مجرد غريزة الأمومة بدون معرفة تبعات ومسؤولية وتحديات رعاية وتربية أبناء بشكل دائم ؟؟

من المسؤول عن استقرار العلاقة من وجهة نظرك كست؟؟
هل شايفة إن الراجل بس؟
ولا شايفة إن العلاقة “مسؤولية مشتركة”؟
إيه دورك إللي إنتي شايفة إنك مسؤولة عنه في استقرار العلاقة واستمرارها بأفضل حال للحياة الطيبة؟؟؟

تحديات استمرار العلاقة كزوجة…
الصبر؟
الاحتواء؟
التعب النفسي؟
ولا فقدان التقدير؟

فكري فيها شوية…
وبعدين اسألي نفسك و ردي عليا
أنا عايزة أكون “زوجة بتشتكي”…
ولا “شريكة واعية بتبني علاقة حقيقية”؟


#رحلةالتغيير

#أنتِ #الأنثى
#أنتِ #الطاقة

بوست عن صميم عملي ككوتش علاقات زواجيه

❌ أي علاقة فيها مشكلات ونزاعات ماينفعش طرف واحد بس هو إللي يقوم بالتغيير وتطوير مسار العلاقة
(لازم تكون جلسات ثنائية....الزوج والزوجة معا)

❌ التغيير والتطور لا يعني رفض الحياة الزوجية والسعي في الطلاق....بل بالعكس ده أفضل وقت للشغل علي إرساء قواعد جديدة لحياة زوجية اكثر مودة ورحمة وتقارب وتفاهم.... لأن بيكون حصل مكاشفة عن المسكوت عنه لسنوات وبدء الدخول لعالم الشريك بحق وحقيق،مش زي الأول ممشيين الدنيا وهي خربانه من جوة .

❌ الإصلاح والتغيير رحلة طويلة محتاجة وقت وصبر ومجهود ومن قبلهم نيه خالصة لله للقرب مش للسعي للمصالح الشخصية.

❌لو مش مقتنع/مقتنعة إن أنت مسؤول/مسؤولة بنسبة ٥٠%عن نجاح أو فشل العلاقة ،يبقي الجلسات مش هتجيب نتيجة.... لأن النتيجة سواء حلوة أو وحشة هي مسؤولية الزوجين معا....الكوتش أو المعالج هو مجرد دليل أو ميسر لرحلة العودة إلي فطرة الزواج السليمة (لو الطرفين عايزين طبعاً)
❌الكوتش أو المعالج ليس ساحر ومعندوش العصا السحرية.....هو يمتلك مهارات وأدوات وتمرينات للأزواج لو استعانوا بيها....إن شاء الله النتيجة هتكون مُرضية ومريحة

✅ تجربة الجلسات أو الاستشارات أرخص وأرحم من العيش في حياة منغصة،او لا قدر الله الوصول للطلاق والانفصال خصوصا لو في أبناء.....
ولا أنفي اللجوء للطلاق كحل أخير بعد استنفاذ الوسائل والحيل.

✅ممكن تكون/تكوني خبراء في شغلكم ،حياتكم الاجتماعية ،في أوساط اصحابكم ،بتعرفوا تحلوا مشاكل أمة لا إله إلا الله كلهم.....وتيجوا عند مشاكلكم المتكررة والمتلاحقة تعجزوا وما تعرفوش.....
إدارة الحياة الزوجية محتاجة مهارات وتعلم....مش نصايح وتجارب وحلول الآخرين

✅ النجاح المهني مش دليل ولا إشارة إنك/أنك تعرفوا تنجحوا كأزواج بدون مجهود.

✅كل الفرص متاحة لإنجاح زواجكم إذا كانت نيتكم وقصدكم النجاح والتوفيق....مش إظهار شريك الحياة بشرير الفيلم...

✅سكة أبو زيد كلها مسالك لمن يرغب ويريد.... الظروف ومشاغل العمل.... ومتابعة نجاحات الآخرين ،مش أهم من نجاح أهم علاقة في الحياة كلها

(وإن يريدا إصلاحاً يوفق الله بينهما)

10 أسئلة تسأليها لنفسك قبل ما تطلبى الطلاق

هل لسه فيه احترام متبادل بينا؟

هل في مساحة أكون نفسي بدون خوف؟

هل بنحاول نحل المشاكل ولا بنهرب منها؟

هل في رغبة مشتركة للتغيير والنمو؟

هل وجودي في العلاقة بيضيف لسلامي النفسي ولا بيستنزفني؟

هل عارفه البي طلبات واحتياجات شريكي ولا بطلب بس؟؟

هل أنا عارفة أنا عايزة إيه حقيقي من العلاقة وبعرف أعبر عنه بكل سهوله ووضوح ؟؟

اللي بيني وبين زوجي خلافات ولا اختلافات ؟؟؟

هل حاولت إبني في العلاقة قبل ما أقرر اهدم ؟؟؟

هل عندي تصور واضح لنفسي ولحياتي بعد الطلاق ،ولا الفكرة شغالة في دماغي وخلاص ،وفاكرة إني كدة بريح دماغي من حوارات الجواز وسنينه؟؟

لو الإجابات صعبة…
ممكن
1- نقعد مع كوتش علاقات
2- ناخد فاصل عشان نواصل
3- الطلاق مش أسهل وأفضل حل،إلا بعد نفاذ محاولات الإنقاذ والإصلاح الحقيقي الصادق من الطرفين طبعاً.

مهما كان عندك مميزات ،إمكانيات،قدرات،

في عالم العلاقات........

أوعي تكون إنسان عشرته صعبة

جملة قالتهالي واحدة صحبتي زمان،لما كنت بقول لها جوزك ماشاءالله خدوم ودايما بيضحك في وش الناس،وبيحب يساعد ،وبيجيبلك اللي إنتي عيزاه

ردت عليا بكل هدوء وإنكسار.....بس ده راجل عشرته صعبة......

كنت صغيره ساعتها ومفهمتش معني الجمله دي......

لكن لما درست واشتغلت مع سيدات كتير...... اكتشفت إن صعوبة العشرة هي أكبر تحدي بتقابله ستات كتير حتي لو ما كانوش عارفين يقولوا الجمله دي.......لكن المعنى واحد

رحم الله كل امرىء هين لين

اللهم ارزقنا لين الجانب واجعله في قلوبنا رحمة للخلق أجمعين.

إيه الحاجة إللي بتعرفي تعمليها بكل سهوله ،ومش مصدقة إنها مهارة ممكن تساعدي بيها؟؟

تعرفي يعني ايه كلمه وعي

انا بقي عندي وعي!!!

الوعي… ليه حياة بعض الستات ما بتتغيرش
رغم إن الظروف حواليها اتغيّرت؟

كلمة الوعي بقت منتشرة قوي،
بس الحقيقة إن أغلبنا فاهمها بشكل سطحي.

في ستات: بتقرأ
مثقفة
ذكية
عدّت بتجارب صعبة
واخدة كورسات وسمعت نصايح كتير

ومع ذلك…
نفس الألم
نفس العلاقات
نفس الخيبات
بتتكرر.

ليه؟

لأن الوعي مش: معلومة جديدة
ولا كتاب
ولا تجربة موجعة
ولا حتى معاناة طويلة

الوعي الحقيقي هو: إنك تشوفي اللي بيحصل جواكي وإنتِ في قلب الموقف
تفهمي ليه فكرك، إحساسك، وتصرفك بيطلعوا بالشكل ده
ويبقى عندك اختيار
مش مجرد رد فعل تلقائي

الوعي هو النقلة من: العيش على الطيار الآلي(بدون ما تحسي أو تفكري بجد)
→ للقيادة الواعية
من التكرار
→ للفهم
من رد الفعل
→ للاختيار

ومن غير النقلة دي
أي تغيير في الظروف
هيفضل تغيير شكلي
وسرعان ما الحياة ترجعك لنفس النقطة.

الوعي مش بيغيّر اللي حصل
لكن بيمنعك تعيشيه تاني…
بأسماء وأشكال مختلفة.

قوليلي بصراحة…
حاسّة إنك بتعيشي بوعي؟
ولا لسه بتجري جوّه نفس الدايرة؟
اكتبي في التعليقات أو ابعتيلي رسالة 🤍