26/10/2026
အစ်ကို ဟိုပွဲမပြိုင်ဘူးလား ဒီပွဲမပြိုင်ဘူးလား။ 👀
ကျွန်တော့်အတွက်တော့ Fitness ဆိုတာ ပြိုင်ပွဲတစ်ခုမဟုတ်ဘူး။ ကောင်းမွန်တဲ့ Lifestyle တစ်ခုပါပဲ။ 💯🔥
ကျန်းမာရေးကို ဂရုစိုက်မယ်။ အစားအသောက်ကို သေချာရွေးချယ်စားသောက်မယ်။ ကိုယ်ဝါသနာပါတဲ့ အားကစားတွေကို ပျော်ပျော်ရွှင်ရွှင် လုပ်မယ်။ အသက်တွေကြီးလာတဲ့အထိ စိတ်သွားတိုင်း ကိုယ်ပါနိုင်အောင် ကြိုးစားပြီး နေထိုင်မယ်။
ဒီလောက်ပါပဲ။
ကျွန်တော် ကျောင်းသားဘဝထဲက အားကစားပွဲတွေ ဝင်ပြိုင်ဖူးပါတယ်။ ပိန်ပြီးနောက်ပိုင်းလဲ ဝါသနာပါတဲ့ အားကစားတစ်ချို့လဲ ဝင်နွှဲလိုက်တာပါပဲ။
ဒါပေမယ့် Charity ပွဲတစ်ချို့ကလွဲလို့ ကိုယ်တိုင် ပိုက်ဆံပေးပြီး ဝင်ပြိုင်ရတဲ့ပြိုင်ပွဲတွေကို သိပ်စိတ်မဝင်စားတော့ ကျွန်တော့်ကို အဲ့လို ပြိုင်ပွဲတွေမှာ တွေ့ရဖို့တော့ ရှားပါတယ်။
ဒါကလဲ ကျွန်တော်တစ်ဦးထဲရဲ့ ခံယူချက်ဖြစ်ပါတယ်။
ဒီကြားထဲမှာမှ ပွဲတချို့တော့ အဖော်ကောင်းလို့ လိုက်ပြေးဖူးပါတယ်။
ဒါပေမယ့် အဲ့ဒီလိုအတွေ့အကြုံတွေကနေ ကျွန်တော် သတိထားမိတာတစ်ခုကတော့…
လူတွေက တစ်ယောက်နဲ့တစ်ယောက် supportive ဖြစ်ဖို့ထက် comparative ဖြစ်ဖို့ ပိုအားသန်လာကြသလို ခံစားရတယ်။
“ဘာဆုယူမှာလဲ” တဲ့။
ပွင့်ပွင့်လင်းလင်းပြောရရင် ကျွန်တော့်ဘဝမှာ မာရသွန်ပြိုင်ပွဲမျိုးတွေဝင်ပြီး ဆုရမယ်လို့ တစ်ခါမှတောင် စိတ်ကူးမယဉ်ဖူးပါဘူး။ အဲ့ဒီအဆင့်အထိ စွမ်းဆောင်နိုင်မယ်လို့လည်း ကိုယ့်ကိုယ်ကို မတွေးဖူးပါဘူး။
ကျွန်တော့်ကို အားကစားသမားကြီးတစ်ယောက်အဖြစ် မြင်ပေးဖို့လည်း မလိုပါဘူး။
တစ်ချိန်က အဝလွန်နေတဲ့ ဖက်တီးတစ်ကောင်ကနေ ကျန်းမာရေးကို ဂရုစိုက်တတ်လာပြီး ကိုယ့်ရဲ့ lifestyle ကို ပိုကောင်းအောင် ပြောင်းလဲဖို့ ကြိုးစားနေတဲ့ လူတစ်ယောက်အဖြစ်ပဲ မြင်ပေးစေချင်ပါတယ်။
အခုနောက်ပိုင်း ပြေးချင်တဲ့နေ့ဆို မနက်စောစောထတယ်။
ဖိနပ်လေးစီးပြီး အပြင်ထွက်ပြေးလိုက်တယ်။
Pace တွေ ranking တွေ ဆုတံဆိပ်တွေကို အမြဲတွေးနေစရာမလိုဘူးလို့လဲထင်တယ်။
ပြေးချင်လို့ ပြေးတယ်။ ပျော်လို့ ပြေးတယ်။ ကိုယ့်အတွက် ကောင်းလို့ ပြေးတယ်။
အသက်တွေကြီးလာတာနဲ့အမျှ စီးပွားရေး၊ လူမှုရေးနဲ့ ဘဝရဲ့ အဖက်ဖက်က ဖိအားတွေကြောင့် လူမှူဘဝမှာ စိတ်ပင်ပန်းစရာတွေကလည်း ပိုများလာပါတယ်။
ဒီလိုအချိန်မှာ လေ့ကျင့်ခန်းလုပ်ခြင်းဟာ ကျွန်တော့်အတွက် stress release လုပ်တဲ့ နည်းလမ်းတစ်ခုဖြစ်ပါတယ်။
ဒါထက်ပိုပြီး အရေးကြီးတာက…
Fitness ဆိုတာ ကျွန်တော့်အတွက် ခန္ဓာကိုယ်တစ်ခုတည်းကို ပြောင်းလဲပေးခဲ့တဲ့အရာ မဟုတ်ဘူး။
အတိတ်က ကျွန်တော့်ကို အတိတ်မှာပဲ ထားခဲ့နိုင်အောင် ကူညီပေးခဲ့တဲ့အရာ။ ကိုယ့်ကိုယ်ကို ပြန်လည်တည်ဆောက်နိုင်အောင် သင်ပေးခဲ့တဲ့အရာ။
ဒီနေ့ထက် မနက်ဖြန်မှာ ပိုကောင်းတဲ့လူတစ်ယောက် ဖြစ်လာဖို့ တွန်းအားပေးနေတဲ့ အရာတစ်ခုပါ။
ဒါကြောင့် ကျွန်တော် လေ့ကျင့်ခန်းလုပ်နေတာ တစ်ယောက်ယောက်ကို အနိုင်ယူဖို့ မဟုတ်ပါဘူး။
တစ်ယောက်ယောက်ရဲ့ အသိအမှတ်ပြုမှုကို ရဖို့လည်း မဟုတ်ပါဘူး။
ကျွန်တော် ကြိုးစားပြီး ပြောင်းလဲခဲ့ရတဲ့ ဒီဘဝလေးကို အသက်ကြီးလာတဲ့အထိ ကျန်းကျန်းမာမာနဲ့ ဆက်လက်ရှင်သန်သွားချင်လို့ပါ။
တခြားသူတွေနဲ့ ပြိုင်ဖို့ထက် ကိုယ့်ဘဝကိုယ် ပျော်ရွှင်ကျေနပ်နေဖို့က ကျွန်တော့်အတွက် ပိုအရေးကြီးပါတယ်။
Not everything in life has to be a competition. Sometimes, being healthy, happy, and at peace with yourself is already a win. ❤️🔥
