Myanmar Sepaktakraw Federation

မြန်မာနိုင်ငံပိုက်ကျော်ခြင်းအဖွဲ့ချုပ်မှ အသိပေးမေတ္တာရပ်ခံခြင်း
-----------------------------------------------------------

မြန်မာနိုင်ငံပိုက်ကျော်ခြင်းအဖွဲ့ချုပ်၏ အဓိကရည်ရွယ်ချက်မှာ မြန်မာ့ပိုက်ကျော်ခြင်းအားကစား အဆင့်မြင့်တက်လာစေရန်၊ နိုင်ငံတကာပြိုင်ပွဲများတွင် အောင်မြင်စွာ ယှဉ်ပြိုင်နိုင်စေရန်နှင့် ပြိုင်ပွဲများကို စနစ်တကျ အောင်မြင်စွာ ဆောင်ရွက်နိုင်စေရန် ဖြစ်ပါသည်။

ယခုအခါ မလေးရှားနိုင်ငံ၊ ကွာလာလမ်ပူမြို့တွင် ကျင်းပလျက်ရှိသော Sepaktakraw World Cup 2026 ပြိုင်ပွဲတွင် မြန်မာ့လက်ရွေးစင်ပိုက်ကျော်ခြင်းအသင်းသည် နိုင်ငံကိုယ်စားပြုအဖြစ် ဝင်ရောက်ယှဉ်ပြိုင်လျက်ရှိပါသည်။

ပြိုင်ပွဲသို့ သွားရောက်ယှဉ်ပြိုင်နိုင်ရေးအတွက် လိုအပ်သော ကုန်ကျစရိတ်များကို အဖွဲ့ချုပ်မှ တာဝန်ယူစီစဉ်ပေးထားပြီး၊ ကစားသမားများ ပိုမိုအဆင်ပြေစွာ ယှဉ်ပြိုင်နိုင်ရန် ပံ့ပိုးကူညီပေးကြသော အားပေးထောက်ပံ့သူများနှင့် Sponsor များ၏ ကူညီပံ့ပိုးမှုများလည်း ရရှိထားပါသည်။

ပြိုင်ပွဲခရီးစဉ်အတွင်း အသင်းအတွက် စားသောက်ရေးစရိတ်များကို စီစဉ်ပေးခဲ့သည့်အပြင် ကစားသမားတစ်ဦးလျှင် အသေးသုံးစရိတ် အမေရိကန်ဒေါ်လာ ၁၀၀ စီကိုလည်း ချီးမြှင့်ပေးခဲ့ပါသည်။

ထို့အပြင် မြန်မာ့လက်ရွေးစင်အသင်းသည် Regu Team ပြိုင်ပွဲတွင် Final အဆင့်သို့ တက်ရောက်နိုင်ခဲ့သည့်အတွက် ကစားသမားများ၏ ကြိုးစားအားထုတ်မှုကို ဂုဏ်ပြုသောအားဖြင့် အဖွဲ့ချုပ်မှ ငွေကျပ် သိန်း ၅၀ ကို အချိန်နှင့်တပြေးညီ ဂုဏ်ပြုချီးမြှင့်ပေးခဲ့ပြီး ဖြစ်ပါသည်။

မြန်မာ့လက်ရွေးစင်အသင်း ပြိုင်ပွဲပြီးဆုံး၍ ပြန်လည်ရောက်ရှိလာချိန်တွင်လည်း အားပေးထောက်ပံ့ကြသော အဖွဲ့အစည်းများနှင့် ပူးပေါင်းကာ ထပ်မံဂုဏ်ပြုချီးမြှင့်နိုင်ရန် ပြိုင်ပွဲမသွားရောက်မီကတည်းက ကြိုတင်စီစဉ်ထားပြီး ဖြစ်ပါသည်။

လက်ရွေးစင်အားကစားသမားများသည် လေ့ကျင့်ရေးစခန်းဝင်ချိန်မှစ၍ မိသားစုများနှင့် ခွဲခွာနေထိုင်ကာ နိုင်ငံ့ဂုဏ်ဆောင်နိုင်ရေးအတွက် ပြင်းပြင်းထန်ထန် လေ့ကျင့်ကြိုးစားခဲ့ကြသူများ ဖြစ်ပါသည်။ ပြိုင်ပွဲတိုင်းတွင် အနိုင်နှင့်အရှုံးသည် အားကစား၏ သဘာဝဖြစ်သော်လည်း ကစားသမားများ၏ ကြိုးစားအားထုတ်မှု၊ စိတ်ဓာတ်နှင့် နိုင်ငံကိုယ်စားပြု ယှဉ်ပြိုင်နေမှုတို့သည် ကျွန်ုပ်တို့အားလုံးအတွက် ဂုဏ်ယူစရာပင် ဖြစ်ပါသည်။

အောင်မြင်ချိန်တွင် တစ်ခဲနက် ဝန်းရံအားပေးကြသကဲ့သို့၊ အခက်အခဲကြုံတွေ့ရချိန်တွင်လည်း ကစားသမားများအတွက် ခွန်အားဖြစ်စေမည့် အားပေးစကားများ၊ အပြုသဘောဆောင်သော အကြံပြုချက်များနှင့် မေတ္တာပို့သမှုများသည် အလွန်တန်ဖိုးရှိပါသည်။

ပိုက်ကျော်ခြင်းအားကစားကို ချစ်မြတ်နိုးကြသော မိဘပြည်သူများအနေဖြင့် ကစားသမားများနှင့် အဖွဲ့ချုပ်အပေါ် စေတနာအရင်းခံ၍ အပြုသဘောဆောင်သော ဝေဖန်အကြံပြုမှုများ ပြုလုပ်ပေးခြင်းကို အဖွဲ့ချုပ်အနေဖြင့် လေးစားစွာ ကြိုဆိုပါသည်။

ထို့အပြင် ပြိုင်ပွဲပြီးဆုံး၍ အသင်း ပြန်လည်ရောက်ရှိလာပြီးနောက် ပြိုင်ပွဲကာလအတွင်း ဖြစ်ပေါ်ခဲ့သည့် အခြေအနေများကို သက်ဆိုင်ရာ တာဝန်ရှိသူများ၊ နည်းပြအဖွဲ့နှင့် ကစားသမားများနှင့်အတူ ပြန်လည်သုံးသပ်ဆွေးနွေးသွားမည် ဖြစ်ပါသည်။ လိုအပ်သည့် ကိစ္စရပ်များအပေါ်တွင်လည်း သက်ဆိုင်ရာ ကစားသမားများအား ခေါ်ယူတွေ့ဆုံကာ ပိုမိုကောင်းမွန်သော အသင်းစည်းကမ်း၊ စိတ်ဓာတ်နှင့် ပြိုင်ပွဲအတွေ့အကြုံများ တည်ဆောက်နိုင်ရေးအတွက် လမ်းညွှန်ဆောင်ရွက်သွားမည် ဖြစ်ပါသည်။

ပိုက်ကျော်ခြင်းအားကစားကို ချစ်မြတ်နိုးကြသူ လူပုဂ္ဂိုလ်များနှင့် အဖွဲ့အစည်းအသီးသီး၏ ကောင်းမွန်သော အားပေးထောက်ပံ့မှုများသည် မြန်မာ့လက်ရွေးစင်အသင်း ပိုမိုအောင်မြင်မှုများ ရရှိနိုင်ရေးအတွက် အဓိကတွန်းအားနှင့် အကောင်းဆုံးသော အထောက်အပံ့များ ဖြစ်ပါသည်။

ယခုအချိန်သည် မြန်မာ့လက်ရွေးစင်အသင်းအနေဖြင့် ပြိုင်ပွဲများကို အာရုံစိုက်၍ ဆက်လက်ယှဉ်ပြိုင်နေရသော အရေးကြီးသည့်အချိန် ဖြစ်ပါသဖြင့် ကစားသမားများ ခွန်အားရရှိစေမည့် အပြုသဘောဆောင်သော ဆုတောင်းမေတ္တာပို့သမှုများနှင့်အတူ တစ်ခဲနက် ဝန်းရံအားပေးကြပါရန် မေတ္တာရပ်ခံအပ်ပါသည်။

မြန်မာနိုင်ငံပိုက်ကျော်ခြင်းအဖွဲ့ချုပ်

မြန်မာအသင်းနှင့်မလေးရှားအသင်းတို့ယှဉ်ပြိုင်ကစားလျက်ရှိသည့် Team Regu Event ပြိုင်ပွဲအား အဖွဲ့ချုပ်Pageမှ Livestream လွှင့်ရန်အခက်အခဲရှိပါသဖြင့် We are Sepaktakraw YouTube Channel တွင်သာ ဝင်ရောက်ကြည့်ရှုပေးပါရန် မေတ္တာရပ်ခံအပ်ပါသည်
ခင်ဗျာ

YouTube Link in comment

Myanmar Plaza Sepaktakraw Challenge Cup 2026တွင် လိပ်သုံးကောင်အသင်းပထမဆုရရှိ

ယနေ့ယှဉ်ပြိုင်ကစားခဲ့ကြသည့် Myanmar Plaza Sepaktakraw Challenge Cup 2026 (မြန်မာပလာဇာပိုက်ကျော်ခြင်းဖလားပြိုင်ပွဲ ၂၀၂၆) ဗိုလ်လုပွဲစဉ်တွင် လိပ်သုံးကောင်အသင်းနှင့်ရွှေကျွန်းသား အသင်းတို့ ယှဉ်ပြိုင်ကစားခဲ့ကြရာ လိပ်သုံးကောင် အသင်းက ရွှေကျွန်းသားအသင်းကို ၂ပွဲပြတ်နှင့် အနိုင်ရရှိခဲ့သဖြင့် လိပ်သုံးကောင်အသင်းက ပထမ၊ ရွှေကျွန်းသားအသင်းက ဒုတိယ၊ USL အသင်းနှင့် YRG အသင်းတို့က ပူးတွဲတတိယဆုတို့ရရှိခဲ့ပါသည်။

ပြိုင်ပွဲအပြီးတွင် ဆုပေးပွဲကိုဆက်လက်ကျင်းပခဲ့ရာ ပထမဆုရရှိခဲ့သည့် လိပ်သုံးကောင်းအသင်းသည် မြန်မာပလာဇာပိုက်ကျော်ခြင်းဖလားပြိုင်ပွဲ ၂၀၂၆ ဆုဖလားကြီး၊ တစ်ဦးချင်းဆုတံဆိပ်ဆွဲပြားများနှင့်အတူ ဆုငွေကျပ်သိန်း (၅၀)ကို ထိုက်ထိုက်တန်တန်ဆွတ်ခူးရရှိခဲ့ပြီး ရွှေကျွန်းသားအသင်းကလည်း တစ်ဦးချင်းဆုတံဆိပ်ဆွဲပြားများနှင့်အတူ ဆုငွေကျပ်သိန်း (၃၀)၊ ပူးတွဲတတိယဆုရရှိခဲ့သည့် USLအသင်းနှင့် YRGအသင်းတို့ကလည်း တစ်ဦးချင်းဆုတံဆိပ်ဆွဲပြားများနှင့်ဆုငွေကျပ် (၁၅)သိန်း အသီးသီးဆွတ်ခူးနိုင်ခဲ့ကြပါသည်။

မြန်မာနိုင်ငံပိုက်ကျော်ခြင်းအဖွဲချုပ်နှင့်မြန်မာပလာဇာတို့ပူးပေါင်းကျင်းပသော အမျိုးသား လေးယောက်တွဲပိုက်ကျော်ခြင်းပြိုင်ပွဲကြီးကို အောင်မြင်အောင်ဝိုင်း၀န်းပေးခဲ့ကြသော အဖွဲ့သားများဖြစ်ပါတယ်ခင်ဗျာ။

Myanmar Plaza Sepaktakraw Challenge Cup 2026 ၏ အကြိုဗိုလ်လုပွဲနှင့်ဗိုလ်လုပွဲ ပွဲစဉ်များ ယနေ့ညနေတွင် ယှဉ်ပြိုင်ကစားသွားမည်

Myanmar Plaza Sepaktakraw Challenge Cup 2026 ၏ အကြိုဗိုလ်လုပွဲ ပွဲစဉ်များဖြစ်သည့် YRG အသင်းနှင့်လိပ်သုံးကောင်အသင်း၊ ရွှေကျွန်းသားအသင်းနှင့်USL အသင်းတို့၏ပွဲစဉ်များကို ယနေ့ညနေ ၅နာရီအချိန်တွင် စတင်ယှဉ်ပြိုင်ကစားသွားမည်ဖြစ်ပြီး ယင်းအကြိုဗိုလ်လုပွဲတွင် အနိုင်ရရှိသည့်အသင်းတို့၏ နောက်ဆုံးဗိုလ်လုပွဲစဉ်ကိုလည်း ဆက်လက် ယှဉ်ပြိုင်သွားမည်ဖြစ်ပါသည်။

မြန်မာပလာဇာပိုက်ကျော်ခြင်းပြိုင်ပွဲတွင် ပထမဆုရရှိသည့်အသင်းအား ဆုငွေ ကျပ်သိန်း(၅၀)၊ ဒုတိယဆုရှိသည့်အသင်းအား ကျပ် သိန်း(၃၀)နှင့် ပူးတွဲတတိယဆုရရှိသည့် အသင်း၂သင်းအား ဆုငွေ ကျပ်(၁၅)သိန်း အသီးသီးချီးမြှင့်ပေးသွားမည်ဖြစ်ပါသည်။

မြန်မာပလာဇာပိုက်ကျော်ခြင်းပြိုင်ပွဲကြီးကို ရန်ကုန်တိုင်းဒေသကြီး၊ ဗဟန်းမြို့နယ်ရှိ မြန်မာပလာဇာ Outdoor Areaတွင်ကျင်းပလျက်ရှိပြီး ပိုက်ကျော်ခြင်းဝါသနာရှင်များနှင့်အားကစားကိုစိတ်ဝင်စားသည့်လူကြီးလူငယ်များ မည်သူမဆို အခမဲ့ကြည့်ရှုနိုင်မည်ဖြစ်ပြီး Myanmar Sepaktakraw Federation Facebook နှင့် မြန်မာနိုင်ငံပိုက်ကျော်ခြင်းအဖွဲ့ချုပ် YouTube Channelတို့မှလည်း တိုက်ရိုက်Live ထုတ်လွှင့်တင်ဆက်သွားပါမည်။

ဓာတ်ပုံ-Cele Gabar (CG)

Youtube ကို ဒီက လွှင့်မယ်
https://youtube.com/?si=TPoEigZKCKi1QPrx