23/05/2026
Дээд лигийн тэмцээний 15-р тойргийн онцлох тоглолт хүснэгтийг тэргүүлэгч “Улаанбаатар” болон 3-р байрт жагсаж байгаа “Дэрэн” багуудын хооронд боллоо. Энэ тоглолтод хожиж байж, тэргүүн байраа хадгалах байсан нийслэлчүүд 2:0 харьцаатай хүчтэй өрсөлдөгчөө хожлоо.
Энэ өдөр Э.Өнөр-Эрдэнэ, А.Дөлгөөн нар өөрсдийн олон жил тоглосон унаган багийнхаа эсрэг тус бүр нэг гоол оруулж, “Дэрэн”-гийн дэмжигчдийг гомдоолоо. А.Дөлгөөний хувьд сүүлийн 3 тоглолтод “Хангарьд”, “Хантерс”, “Дэрэн” гэсэн эхний тавт багтаж байгаа багуудын эсрэг тоглохдоо 4 гоолд шууд оролцжээ. Тодруулбал тэрээр энэ тоглолтуудад 1 гоол оруулж, 3 гоолын дамжуулалт өгч баг нь чухал хожлуудаа авахад гол үүрэгтэй тоглолоо.
Хоёр баг эхний тойрогт урчаа таарахад 1:1 харьцаатай тэнцсэн бөгөөд хүчтэй байгаа “Улаанбаатар” багаас энэ улирал оноо салгасан 2 багийн нэг нь “Дэрэн” байсан юм. Гэсэн ч энэ удаад тэргүүлэгчид бүтэн 3 оноогоо авч чадлаа. Ийнхүү тэд улиралд 12 хожил, нийт 38 оноотой лигийн багуудыг амжилтаараа хошуучилж байна.
21/05/2026
20/05/2026